Semei qalasynyń ákimi Ermak Sálimov «Semei-Novosibir» baǵytyndaǵy órtengen avtobýstan 48 jolaýshyny qutqarǵan Erjan Amarhanovpen kezdesti, dep habarlaidy "Ult aqparat".
Eske sala keteiik, tamyzdyń 4-inen 5-ine qaraǵan túni «Semei - Novosibir» baǵytyndaǵy jolaýshylar avtobýsy órtke oranǵan bolatyn. Sol avtobýsta otyrǵan 37 jastaǵy semeilik Erjan tilsiz jaýdan 48 jolaýshyny jalǵyz ózi qutqardy. Ol adamdardy syrtqa shyǵaryp, jantalasyp júrgende onyń qujattary men kólik satyp alý úshin alyp shaqqan 1,4 mln teńgeden astam aqshasy janyp ketti.
Qala basshysy beibit kúnniń batyryn jeke qabyldady. Ermak Bidahmetuly azamattyq, erlik tanytqan úshin Erjanǵa rizashylyǵyn bildirdi.
«Saǵan azamattyq kórsetkeniń úshin alǵys aitamyn. Naǵyz er jigitke tán qasiet tanyttyń. Kez-kelgen adam óz basyn qaterge tigip, erlik jasai bermeidi», - dedi qala ákimi.
Qazirgi ýaqyttta janyp ketken barlyq qujattaryn rásimdeý boiynsha jumystar júrip jatyr. Novosibir qalasynan kólik alýǵa dep jinaǵan qomaqty qarjysynyń janyp ketýine bailanysty, jergilikti kásipker «Gordorstroi» JShS direktory Baýyrjan Qairambaev 1 million teńge berdi.
Qala ákimi Ermak Sálimov onyń jeke ómiri, otbasy týraly bilip, jergilik bilik kómek kórsetýge daiyn ekenin jetkizdi.
Búginde Erjan bos ýaqytynda jas sportshylardy kúreske jattyqtyrýmen ainalysady. Bul baǵyttaǵy jumystaryna aldaǵy ýaqyttta Ermak Bidahmetuly qoldaý bildiretinin aitty.
