COVID-19 pandemiiasynan týyndaǵan ótken jylǵy quldyraýdan keiin eńbek naryǵyndaǵy jaǵdaidy qalpyna keltirýmen qatar, eńbek qyzmetiniń balamaly nysandaryn damytý arqyly jumyspen qamtýdyń sipaty da ózgerýde. Bul týraly Eńbek jáne halyqty áleýmettik qorǵaý ministrliginen málim boldy, dep habarlaidy "Ult aqparat".
«Búgingi tańda álemdegi árbir 5-shi adam qashyqtan jumys isteýge kóshti nemese úiinde jumys istei bastady. «Eńbek resýrstaryn damytý ortalyǵy» AQ (ERDO) sarapshylarynyń derekterine sáikes, Qazaqstanda 2021 jyldyń 1-toqsanynyń qorytyndysy boiynsha 73,7 myń adam qashyqtan jumys istedi, olardyń 70,2 paiyzy negizinen qalada turatyn áiel adamdar», - delingen ministrlik málimetinde.
2020 jyldyń basym bóliginde COVID-19 saldarynan jumystyń ikemdi túrlerine kóshý protsesin jedeldetý búginde Qazaqstanda qashyqtan jumyspen qamtýdyń keń taralýynda kórinis tabýda. Qashyqtan jumys istegen nemese jumys istei bastaǵan azamattardyń eńbek qyzmetin engizý - óz kezeginde qoǵamnyń jumyspen qamtýdyń balamaly nysandaryn qabyldaý protsesin jedeldetýge múmkindik berdi. Osynyń nátijesinde Qazaqstanda erkin tabys dep atalatyn ekonomikanyń damýy, eńbek qyzmetine áielder men aýyl turǵyndaryn belsendi tartý boldy.
ERDO Strategiia jáne jobalyq basqarý departamentiniń direktory Aleksandra Molchanovskaianyń aitýynsha, el boiynsha qashyqtan jumys isteitin árbir 3-shi adam aýyl turǵyny bolyp otyr. Jumys berýshiler qashyqtan jumys isteitin qyzmetkerlerdiń tek 14 paiyzyna ǵana kommýnikatsiia quraldaryn bergen.
