Respýblika biýdjetinen qashyqtan oqytýdy uiymdastyrý úshin qarjy bólingen joq. Bul týraly QR Bilim jáne ǵylym ministri Ashat Aimaǵambetov aitty, dep habarlaidy "Ult aqparat".
«Keshe qashyqtan oqytýǵa qarjy bólýge qatysty kóterilgen máselelerge orai birneshe sóz aitqym keledi. Búginde BAQ-ta kóptegen túrli aqparattar tarap jatyr. Bireýler qashyqtan oqytýǵa 70 mln dollar bólindi degendi aityp júr», - dedi ol Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, ótken oqý jylynyń 4-toqsanynda qashyqtan oqýǵa kóshirý májbúrli shara bolǵan.
«Bul aqparat shyndyqqa sai emes. Óitkeni qashyqtan oqytý osy jyldyń sáýir aiynda ǵana engizile bastady. 4-toqsanda qashyqtan oqytýdy júzege asyrý jaiynda aitar bolsaq, oǵan qarajat bólingen joq. Sebebi sol ýaqytta, 4-toqsanda bizdiń internet-platformalar barlyq resýrstaryn ashyp qoidy. Tótenshe jaǵdai rejimi kezeńi bolǵandyqtan, bul tolyqtai tegin jasaldy. Biz áriptesterimizge ótinish jasadyq, olar qoldaý kórsetti. Buǵan qosa, 4-toqsanda televiziialyq sabaqtar da tegin túsirilip, kórsetildi», - dedi Ashat Aimaǵambetov.
