Qashyqtan oqytý balalar men ustazdardyń densaýlyǵyn saqtaý maqsatynda týyndady. Bul týraly QR Premer-Ministriniń orynbasary Eraly Toǵjanov aitty, dep habarlaidy "Ult aqparat".
«Sóz joq, balalardyń bilimi óte mańyzdy. Degenmen, olardyń densaýlyǵy basty nazarda ári basty maqsat. Bul baǵyt Qazaqstan Prezidenti Qasym-Jomart Toqaevtyń tikelei nazarynda tur. Jalpy, Qazaqstandaǵy epidemiologiialyq jaǵdai turaqty. Búginde táýliktik ósim 0,1 paiyzdy qurap otyr. Búgin COVID-19 juqtyrýdyń 86 jaǵdaiy tirkeldi. Osy jyldyń 5 shildesinen bastap naýqastardy jatatyn orynmen qamtamasyz etý qajettiligi 6 esege, KVI máseleleri boiynsha jedel meditsinalyq kómek shaqyrýlary 5,5 esege azaidy. Naýqastardyń 99 paiyzy saýyǵyp, aman-esen otbasyna oraldy. Bul COVID-19-ben kúresýdiń durys joly tańdalǵanyn jáne onyń naqty nátijesin kórsetedi», - dedi ol Ortalyq kommýnikatsiialar qyzmetindegi baspasóz máslihatynda.
Sonymen qatar ol álemdegi COVID-19 jaǵdaiyna qatysty derektermen toqtalyp, dúniejúzinde qaýip áli seiilmegendigin aitty.
«Kún saiyn 250 myńnan astam naýqas jáne 5 myńnan astam ólim-jitim tirkelip otyr. Italiia, Frantsiia, Germaniia, Avstriia, Ispaniia, Túrkiia, Ulybritaniiada sońǵy aida aýrýdyń ósýi baiqalady. Sonymen qatar ózimizben kórshiles TMD elderi arasynda da másele bar. Reseide búgingi ósim deńgeii 0,5, Ózbekstanda 0,9, Tájikstanda 0,4 paiyzdy qurap otyr. Olardyń bárimen biz tyǵyz qarym-qatynasta otyrǵan memleketpiz. Sondyqtan mektepterdiń jumysyn, oqý protsesin qashyqtan oqytý baǵytyna aýystyrý týraly sheshim balalardyń, sonymen qatar ustazdardyń densaýlyǵyn barynsha saqtaý maqsatynan týyndap otyr», - dedi Eraly Toǵjanov.
