QR Bilim jáne ǵylym ministri Ashat Aimaǵambetov memleketterde sabaq oqýdy jalǵastyra berý týraly sheshimnyń mańyzdylyǵy týraly aitty, dep habarlaidy QazAqparat.
«Tótenshe jaǵdai kezeńi qashan aiaqtalatynyn eshkim aita almaidy. Biz álemdegi 167 memlekettiń tájiribesine súienemiz. Milliardtan astam oqýshy qashyqtan oqý rejimine kóshti. Bizge eki túrli usynys aityldy, birinshisi, oqý protsesin tolyq toqtatyp, jyldyq baǵa qoiý. Munymen túbegeili kelispeimiz. Ekinshisi, oqý protsesin shilde aiynyń aiaǵyna kóshirý. Tamyz aiynda oqyp, qyrkúiek aiynda qaitadan oqý jylyn bastaý balalar úshin qiyn. Shildege deiin uzaq ýaqyt úzilis jasaýdyń mánisi joq», - deidi QR Bilim jáne ǵylym ministri Ashat Aimaǵambetov.
Sonymen qatar, ministr tórtinshi toqsanda balalar úshinshi toqsanda ótken taqyryppen bailanysty sabaqtar ótetindigin aitty.
«Úshinshi jáne tórtinshi toqsandar bir-birimen bailanysty. Jazda mektepter jańa oqý jylyna daiyndalyp, jóndeý jumystary júrgiziledi. Álem elderi memleketter sabaq oqýdy jalǵastyra berý týraly sheshimdi jaidan-jai qabyldaǵan joq. Bul durys saiasat dep oilaimyz. Bizge ońai bolmaidy, biraq bul – balalarymyz úshin de, bilim júiesine de eń tiimdi sheshim», - dep tolyqtyrdy ministr.
Osy rette ministr qashyqtan oqytý bilim sapasyna qalai áser etetinine toqtaldy.
«Kóp nárse keri bailanys jasaityn muǵalimge, muǵalimdi qoldaityn ata-anaǵa bailanysty. Muǵalim, oqýshy jáne ata-ana birigip jumys istese, dástúrli oqýdan qaraǵanda jaqsy nátijege qol jetkizemiz. Qashyqtan oqý – óz ózińmen jumys istei bilý, uiymdastyra bilý, jobalyq jumys, sondyqtan ol oqýshyny jańa mashyqqa úiretedi», - deidi ol.
