Mektepke deiingi orta bilim berý komitetiniń tóraǵasy Maira Meldebekova BAQ ókilderine bergen suhbatynda Dúniejúzilik bankpen birge júrgizilgen zertteýdiń alǵashqy nátijesi týraly málimet berdi, dep habarlaidy QazAqparat.
«Qashyqtan oqytýdyń sapasy boiynsha Bilim jáne ǵylym ministrligi Dúniejúzilik banktiń sarapshylarymen birge zertteý júrgizdi. Árine, sapaǵa bailanysty suraqtar bolady. Mysaly joǵary synyp oqýshylarynyń aqparattyq tehnologiialardy jaqsy meńgerýi qashyqtan berilgen bilimniń sapasyna oń áser etip otyr. Kúndelikti rejimin naqty rettep úirengen balalar kerisinshe osyndai formatty yńǵaily dep otyr. Qosymsha úiirmeler men sportpen shuǵyldanýǵa bos ýaqyt tabylǵanyn alǵa tartýda», - degen ministrlik ókili qashyqtan berilgen bilimge birjaqty baǵa berýge bolmaidy degen paiymyn jetkizdi.
«Zertteý qorytyndysy bilim sapasynda másele bar ekenin kórsetti. Sondyqtan da jazǵy mektepti qolǵa alyp otyrmyz. Oqý jylynyń qorytyndysy barlyq qorytyndy baǵalar qoiylyp bitkennen keiin júrgiziledi. Biraq, muǵalim retinde dástúrli oqytýdy qashyqtan oqytý formatymen salystyrýǵa bolmaitynyn aitar edim. Muǵalim oqýshymen kózbe-kóz otyryp, taqyrypty túsindirýi múlde bólek dúnie. Mundai oqytýdyń ádistemesi de ózgeshe. Al qashyqtan oqytý formatynda túrli tehnologiialar qoldanylady. Sinhrondy jáne asinhrondy degen eki túrli format bar. Sondyqtan, qashyqtan bilim berdýiń bilim sapasynda kórinis tabatyny belgili. Keibir oqýshylardyń qashyqtan oqýǵa jaǵdaiy kelińkiremei jatty. Kompiýtermen, internetpen problema bolǵanyn bilesizder. Sonyń bárin eskersek, endi bizge sol olqylyqtardyń ornyn toltyrý kerek bolyp otyr», - dedi Maira Meldebekova.
