Qashaǵandaǵy munai óndirý kólemi táýligine 500 myń tonna barrelge jetkizilýi múmkin. Bul týraly búgin Úkimet úiindegi baspasóz máslihatynda QR Energetika birinshi vitse-ministri Mahambet Dosmuhambetov aitty, dep habarlaidy QazAqparat.
«Búgingi kúni Qashaǵan tájiribelik-óndiristik ázirleme aiasynda igerilip jatyr. Muny birinshi fazasy desek te bolady. Qazirgi ýaqytta táýligine 380 myń barrel munai óndiriledi. Dál osy faza aiasynda kezeń-kezeńimen táýligine 420 myńnan 500 myń barrelge deiin jetkizý josparlanǵan. Biraq, bul tek birinshi fazada ǵana. Sóz ken ornyn barynsha qamtý arqyly Qashaǵandy tolyq aýqymda igerý jaiynda bolyp otyr. Árine, bul jańa araldar salý, jańa óndirisishilik qural-jabdyqtar men uńǵymalardy burǵylaýǵa orai úlken shyǵystarmen bailanysty jáne konsortsiým túrli nusqalaryn qarastyryp jatyr», - dedi birinshi vitse-ministr.
Osy oraida ol Qashaǵandy tolyqqandy igerý úshin «Bolashaq» gazdy qaita óńdeý zaýytynyń qýaty jetispeitindigin aitty.
«Birinshi faza aiasynyń ózinde óndirilgen ilespe gaz kólemin kádege jaratý munai óndirýdi arttyrýǵa kedergi keltiretin faktor bolyp tur. Al »Bolashaq« zaýyty óziniń qujattyq qýatyna sáikes tehnikalyq turǵyda ony eńsere almaidy. Sondyqtan da boljammen jylyna 1 mlrd tekshe metrlik óndiristik qýaty bolǵanymen odan keiin eselei túsýge múmkindigi bar modýldik turǵyda gazdy qaita óńdeitin zaýyt salý nusqasy qarastyrylýda», - dedi ol.
Sonymen qatar ol bul máseleniń ázirshe tehnikalyq turǵyda qarastyrylyp jatqandyǵyn eskertti.
«Árine, bári jobanyń quny men qarjylandyrý máselesi bailanysty bolyp otyr. Másele ázirshe talqylanyp jatyr. Menińshe, gazdy kádege jaratýdaǵy kedergilerdi joiý, ony qaita óńdeý jáne soǵan orai munai óndirý kólemin arttyrý úshin bul eń durys sheshim bolmaq. Bul respýblikaǵa gazdyń qosymsha kólemin de berer edi», - dedi Mahambet Dosmuhambetov.
