Foto: Akorda.kz
Prezident Qarjylyq monitoring agenttiginiń tóraǵasy Janat Elimanovty qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysyna Qarjylyq monitoring agenttiginiń biylǵy 9 aida atqarǵan jumystarynyń nátijesi jáne aldaǵy ýaqytqa arnalǵan jospary týraly baiandaldy.
Qasym-Jomart Toqaevqa jyl basynan beri memleketke jalpy somasy 217 milliard teńge bolatyn aktivter qaitarylǵany, sondai-aq kóleńkeli ekonomikanyń deńgeii 18,7 paiyzǵa deiin tómendegeni jóninde málimet berildi.
Sonymen qatar Janat Elimanov quqyq qorǵaý organdaryna 229 taldaý materialy joldanǵanyn, esirtki satýshylardyń qarjylyq operatsiialaryn buǵattaý tájiribesi jolǵa qoiylǵanyn aitty. Bul jumys azamattardy, ásirese jastardy, esirtkini onlain satyp alýdan saqtaidy.
Onyń aitýynsha, esirtkiniń zańsyz ainalymynan túsetin kiristerdi jylystatý úshin paidalanylǵan 924 banktik shot buǵattalǵan. Kriptoaktivterdi paidalana otyryp jasalatyn ekonomikalyq qylmystarǵa qarsy is-qimyl jónindegi arnaiy bólimshe qurylǵan. Kripto-ámiiandarǵa tyiym salý jáne tsifrlyq valiýtany alyp qoiý tetigi ázirlengen. Zańsyz 9 kripto almastyrǵyshtyń qyzmeti joiylǵan. Ondaǵy qarjy ainalymy 17 milliard teńgeden asqan.
Prezidentke Qazaqstanda alǵash ret kriptovaliýta arqyly qylmystyq jolmen tapqan 47 million teńge tabys tárkilenip, Agenttiktiń Binance kriptobirjasyndaǵy arnaiy shotyna salynǵany jóninde baiandaldy. Budan bólek, terroristik jáne ekstremistik uiymdardyń shottaryna qarajat aýdarýdy kózdegen 976 áreket anyqtalyp, buǵattalǵan. Ekonomikalyq quqyq buzýshylyqtardyń keibir belgileri boiynsha qylmystyq qýdalaýdy jeńildetý (dekriminalizatsiia) týraly usynystar engizilgen. Bul kásipkerlerdi qorǵaý sharalaryn kúsheitýge múmkindik beredi.
Qasym-Jomart Toqaev Agenttik qyzmetiniń negizgi baǵyttary boiynsha birqatar naqty tapsyrma berdi. Memleket basshysy adal biznesti qorǵaý, qarjy jáne ekonomikalyq qylmystarǵa qarsy kúres sharalaryn kúsheitý qajet ekenin erekshe atap ótti.
