QR Qarjylyq monitoring agenttigi burynǵy Densaýlyq saqtaý ministri Eljan Birtanovtyń isine qatysty túsinikteme berdi, dep habarlaidy QazAqparat.
«Burynǵy Densaýlyq saqtaý ministri E.Birtanovqa qatysty qylmystyq istke qatysty agenttiktiń túsiniktemesiniń nelikten joq ekendigine qatysty BAQ ókilderinen saýalnamalar túsip jatyr. Qylmystyq-protsestik kodekstiń 201-babyna sáikes sotqa deiingi bul tergeý jariia etýge jatpaitynyn jáne prokýrordyń kelisimimen ǵana málimetterdiń jariia etilýi múmkin ekenin habarlaimyz. Aita keterligi, atalǵan tergeýge qatysty málimetterdi jariia etpeý talaby tergeý organdarymen qatar qorǵaýshy tarapqa da qatysty. Sondyqtan, ádil bolý úshin agenttik qylmystyq istiń jai-japsaryna túsinikteme bermeidi. Iske qatysty figýranttyń kináli ne kinásiz ekendigin Konstitýtsiianyń 77- babynyń 3-tarmaǵyna sáikes sot qana aiqyndai alady», - dedi QR Qarjylyq monitoring agenttiginiń resmi ókili Gaýhar Saparbaeva.
Onyń atap ótýinshe, osy jyldyń shilde aiynda agenttik burynǵy Densaýlyq saqtaý ministri Birtanov pen onyń orynbasary Ábishevke qatysty sotqa deiingi tergeý amaldaryn aiaqtaǵan.
«Birtanov pen Ábishev Densaýlyq saqtaý ministrliginiń jumys istemeitin aqparattandyrý platformasyn qabyldaý jáne paidalaný arqyly laýazymdyq ókilettigin asyra qoldaný kúdigine iligip otyr. Platforma densaýlyq saqtaý júiesindegi problemalardy jedel sheshý úshin patsientter, dári-dármek jáne meditsinalyq buiymdar týraly barlyq aqparatty biriktirýi tiis bolatyn. Platforma esh ýaqytta jumys istemegen jáne meditsina uiymdary ony qoldanbaidy. Bul jinaqtalǵan dáiektermen dáleldenip otyr. Oryndalmaǵan jumys quny - 4,1 mln dollar nemese 1,5 mlrd teńge», - dedi resmi ókil.
Sonymen qatar Gaýhar Saparbaeva E.Birtanovtyń 22 shildede sanitarlyq aviatsiia ushaǵyn jeke maqsatta qoldaný arqyly laýazymyn asyra paidalaný kúdigine iligip otyrǵanyn aitady.
