Qarjy piramidasynyń qurbany bolmaý úshin nege nazar aýdarý kerek?

1. Ákelgen klientter úshin syiaqy týraly ýáde - bonýstar.

"Sizge kompaniiaǵa ákelgen árbir klient úshin qosymsha aqy tóleýge ýáde berilse, bul aqsha salmaý, barlyq tanysty osyndai qaýipti nárseden aýlaq bolýǵa shaqyrý úshin jetkilikti negiz bolady", - dep túsindirdi Ádilov.

2. Naryq deńgeiinen birneshe ese joǵary kiriske kepildik berý.

"Túrli "investitsiialyq kompaniia" tabysqa kepildik bere almaidy, buǵan zań júzinde tyiym salynǵan. Bireý kepildik berse, onda ol - alaiaq. Barlyǵy óte qarapaiym", - dedi ol.

3. Qajet litsenziialardyń bolmaýy.

"Kompaniia aqsha salymdaryn tartsa nemese qor naryqtaryna investitsiia salýdy usynsa ári onyń litsenziiasy bolmasa, onymen bailanysý kerek pe, joq pa, úsh márte oilanyńyz. Mundai uiymdar qarjy monitoringi agenttiginiń baqylaýynda emes, iaǵni eshkim Sizdiń quqyqtaryńyz ben múddelerińizdi qorǵai almaidy", - dedi IIM ókili.

4. Alǵashqy jarnanyń bolýy: resimdeýge, oqytýǵa, aktsiialarǵa.

"Ádette, bul jarna - piramida uiymdastyrýshylarynyń negizgi kirisi, sondai-aq, qarjy piramidasynyń aiqyn jáne ózine tán belgisi", - dedi Ádilov.

5. Menshikti negizgi quraldardyń, basqa da qymbat aktivterdiń bolmaýy.

"Kompaniianyń qolda bar múlki men aktivteri qolaisyz oqiǵa bolǵan jaǵdaida satylýy jáne salynǵan aqshany ishinara qaitarýy qajet. Biraq qarjy piramidasynda mundai aktivter joq", - dedi IIM Tergeý departamentiniń bastyǵy.

6. Teris jarnama naýqany.

"Qarjy piramidalarynyń jarnamasy kóptegen klientti tez tartýǵa arnalǵan jáne tek piramidalardyń negizin qalaýshylardyń ózderine paidaly bolatyn aqparatty qamtidy. Árine, jarnama berýshiler mundai kompaniianyń klienti tap bolýy múmkin qaýipti jaǵdailardy aitpaýǵa tyrysady", - dep túsindirdi ol.

7. Uiym qyzmetiniń naqty anyqtamasynyń bolmaýy.

"Piramidanyń salymshylardyń ózinen basqa klientteri joq. Sizge eshqashan jetkizýshilerdi, mysaly, basqa biznes seriktesterdi kórsetpeidi. Kompaniiaǵa aqsha salmas buryn, ol týraly múmkindiginshe, kóp aqparat alyńyz. Pikirlerdi zertteńiz, bul máselege muqiiat qarańyz. Barlyq qujatty oqyńyz. Kompaniia naqty nemen ainalysady jáne aqshańyz qaida salynady, bilińiz. Kompaniia kez kelgen syltaýmen aqparat berýden bas tartsa, tipti qujattarmen tanystyrmasa, salynǵan aqshany alý qiyn bolady", - dep qosty Ádilov.

8. Konsýltatsiia tek jeke kezdesýde berilse.

"Jeke kezdesýde klienttiń senimine kirip, ony aqsha salýǵa kóndirýi úshin túrli psihologiialyq ádister men amaldardy qoldaný ońaiyraq", - dedi ol.

9. Olar "kelisimshartqa" qol qoiý kezinde oilanbaýǵa shaqyrady.

"Asyǵys sheshim qabyldamańyz. Kelisimsharttyń úlgisin surańyz jáne ony úide zerdeleńiz. Jeke erejeleri sizge qiyndyq týdyrsa, mamanmen keńesýge tyrysyńyz. Berilgen aqshanyń ornyna sizde qandai qujat bar ekenin qarańyz. Onyń zańdy kúshi bar ma?

Kez kelgen qarjylyq qujatty, ásirese kelisimshartty muqiiat oqyp shyǵýdy ádetke ainaldyryńyz. Túsinbesten eshteńege qol qoimańyz. Sizge kelisim nemese onyń jeke erejeleri unamasa, oǵan qol qoimańyz", - dep túiindedi Ádilov.

Ishki ister ministrligi beitanys adamdarǵa óz aqshalaryn bermes buryn oilanýdy usynady.

"Óz qarajatyńyzdy senip tapsyrǵyńyz keletin uiymda aitylǵan belgilerdiń barlyǵyn nemese birnesheýin tapsańyz, sizdi qarjy piramidasyna tartýǵa tyrysyp jatqan joq pa, oilaný qajet", - dep qorytyndylady Ádilov.