Qaraǵandyda QR Qylmystyq kodeksiniń 217-baby boiynsha qylmystyq jaýapkershilikke tartylǵan 34 jastaǵy er adamǵa sot úkimi shyqty. Qysqa ýaqyt aralyǵynda alaiaq 67 adamdy aldap, 50 mln teńgeden astam qarajatty qoldy qylǵan, dep habarlaidy QazAqparat.
2019 jyly mobildi qosymshalardyń birinde qaraǵandylyq alaiaq chat ashyp, onyń kómegimen qoldanystaǵy investitsiialyq baǵdarlama týraly jalǵan aqparat tarata bastaǵan.
Salymshylardy ziiankes baǵdarlamanyń basty mindeti - salynǵan somaǵa bailanysty eki ese mólsherde paida alý maqsatynda qarajatyn belgili bir birjaǵa investitsiialaý dep sendirgen.
Ol oidan marketingtik jospar quryp, oǵan sáikes jinalǵan aqshaǵa keibir kompaniialardyń aktsiialaryn satyp alyp, basqa kompaniialardyń aktsiialaryn satýǵa jumsalady dep kórsetilgen.
Eki jyl boiy Qaraǵandy oblysy politsiia departamenti tergeý basqarmasynyń tergeýshileri kúdikti kinásiniń bultartpas aiǵaqtaryn muqiiat jinaǵan.
«Óziniń týystary men tanystarynyń bank kartochkalaryn paidalana otyryp, er adam qolma-qol aqshasyz aqsha aýdarý arqyly azamattardan salym qabyldai bastady. 2019 jylǵy 27 qazanda QR QK 217-baby boiynsha qylmystyq is tirkeldi. Tergeý barysynda 67 jábirlenýshi anyqtaldy. Olarǵa jalpy somasy 51 mln 435 myń teńge zalal kelgen. Sot úkim shyǵardy, oǵan sáikes qarjy piramidasyn qurýshy bes jylǵa bas bostandyǵynan aiyryldy», - dep habarlady Qaraǵandy oblysy PD bastyǵy Erlan Faizýllin.
