QR Qarjy ministrligi aldaǵy ýaqytta ótetin kezekten tys prezidenttik sailaýǵa jumsalatyn shyǵystardyń keibir bóligine kelisim bermedi. Bul týraly búgin Ortalyq sailaý komissiiasynyń hatshysy Sábila Mustafina aitty, dep habarlaidy QazAqparat tilshisi.
«Qarjy ministrligine jiberilgen osy jolǵy sailaý naýqanyna arnalǵan shyǵystardyń boljamdy smetasy shamamen 12 mlrd teńgeni quraidy. «Sailaý týraly» Konstitýtsiialyq zańǵa sáikes Ortalyq sailaý komissiiasy atalǵan sailaý naýqanyn ótkizý úshin shyǵystardyń boljamdy smetasyn esepteidi. Ol atalǵan normaǵa sai ázirlengen jáne Qarjy ministrligine jiberilgen somanyń 77 paiyzy ýchaskelik jáne aýmaqtyq sailaý komissiialarynyń músheleriniń jalaqysyna eseptelgen. Bul esepteý eń tómengi jalaqyny negizge ala otyryp jasaldy», - dedi ol.
Onyń aitýynsha, ýchaskelik jáne aýmaqtyq sailaý komissiialarynyń quramynda biýdjet qyzmetkerleri, zeinetkerler, ózin-ózi jumyspen qamtyǵandar jáne stýdentter bar.
«Qarjy ministrligine ótinimhat jibergenimizge eki kún ótti. Búgin qorytyndy kútip otyrmyz. Biraq, keibir pozitsiialar qoldaý tappady. Ol keibir shyǵystardy ońtailandyrýmen bailanysty. Bul durys ta. Sebebi bul boljamdy smeta edi. Buǵan qosa Qarjy ministrligi óńirlerdiń baǵa usynystaryn da jiti qarap shyqty. Biz smetany aýmaqtyq sailaý komissiialarynyń biýdjettik ótinimi negizde jasadyq. Al ár óńirdiń ózindik baǵa saiasaty men naryqtyq jaǵdaiy bar», - dedi OSK múshesi.
Osy rette Sábila Mustafina kelesi aptanyń basynda Úkimette aldaǵy sailaýǵa jumsalatyn shyǵyndardyń smetasy qaralatynyn aitty.
