Qazaqstan premer-ministriniń birinshi orynbasary – qarjy ministri Álihan Smaiylov áielderdiń zeinet jasyn 55 jasqa deiin tómendetýge qatysty túsinikteme berdi, dep habarlaidy Sputnik Qazaqstan.
6 qyrkúiekte prezidenttiń tóraǵalyǵymen ótken Ulttyq qoǵamdyq senim keńesiniń otyrysynda qoǵam qairatkeri Jánibek Qojyq áielderdiń zeinet jasyn 55 jasqa deiin tómendetýdi usynǵan bolatyn. BAQ ókilderi osyǵan qatysty qarjy ministriniń pikirin surady.
Smaiylov qazir elde zeinet jasyn tómendetý emes, ulǵaitý jumysy júrip jatqanyn eske saldy.
"Bul usynysty estidik, alaida qazir búkil álemde keri protsess júrip jatyr. Álem elderinde áielder zeinetke 65-67 jastan shyǵady. Sebebi jer betindegi halyqtyń ómir súrý deńgeii jaqsaryp keledi", - dedi ol májilis kýlýarynda.
Ministr ulttyq keńeste aitylǵan barlyq usynys úkimette qaralyp jatqanyn jetkizdi. Tiisti memlekettik organdar ár usynysty saralap, óz pozitsiiasyn daiyndaidy.
"Zeinet jasyn tómendetý týraly usynysty da qarastyramyz. Alaida bul jerde mynadai bir problema bar. Qazir jer sharynda 65 jastan asqan halyqtyń úlesi artyp keledi. Biz de osy jeti protsenttik shekten asyp kettik. Iaǵni, jasy alpys besten asqan halyqtyń sany 7 protsentten kóp. Elimizde egde jastaǵy azamattardyń sany jyldan jylǵa kóbeiip keledi. Eger biz zeinetkerlerdi laiyqty ómirmen qamtamasyz etkimiz kelse, zeinetaqy júiesiniń turaqtylyǵyna mán berýimiz qajet", - dedi Smaiylov.
Onyń aitýynsha, elde eńbekke qabiletti qansha azamat jumys isteitinin, qansha azamat zeinetaqy júiesi esebinen qamtamasyz etilgenine taldaý jasalypty. Onyń qorytyndysy boiynsha áielderdiń jasyn kezeń-kezeńmen ulǵaitý týraly zań qabyldanǵan. Dese de, onyń aitýynsha, ulttyq keńeste jariia etilgen usynystar qosymsha talqylanady.
Jýrnalisterdiń 63 jas tym kóp emes pe degen suraǵyna ministr:
"Bul ómirdiń qatal shyndyǵy", - dep qysqa qaiyrdy ol.
Aita ketsek, Qazaqstanda áielderdiń zeinet jasy 2027 jyldyń 1 qańtaryna qarai birtindep 58 jastan 63 jasqa deiin ulǵaiady. Jyl saiyn zeinet jasyna jarty jyldan qosylyp otyrady
