Orta merzimdi kezeńde transfert somasy birtindep qysqaratyn bolady. Bul týraly Parlament palatalarynyń birlesken otyrysynda Qarjy ministri Erulan Jamaýbaev málim etti, dep habarlaidy QazAqparat.
«Esep komiteti Ulttyq qorǵa aýdarylýy tiis qarajattardyń basqa maqsattarǵa jumsalǵany týraly atap ótti. Ótken jyly Ulttyq qorǵa jiberilýi tiis barlyq salyqtar men tólemder tolyq kólemde aýdaryldy. Qarashyǵanaq jobasyna qatysty arbitrajdyq daýlardyń qorytyndylary boiynsha qarjylyq ótemaqyny aýdarý biýdjettik synyptamaǵa jáne zańnamaǵa sáikes «Respýblikalyq biýdjetke salyqtyq emes basqa da túsimder» kodyna tústi. Iaǵni bári maqsatqa jáne zańǵa sai. Bul rette, Ulttyq qordyń aktivteri 2020 jyly 744 mlrd teńgege ósti», - dedi Jamaýbaev Úkimet pen Esep komitetiniń 2020 jylǵa arnalǵan respýblikalyq biýdjettiń atqarylýy týraly esepterin qaraý kezinde.
Onyń aitýynsha, qordy basqarýdan túsken investitsiialyq kiris 4,1 trln teńge qurady, bul 2019 jylmen salystyrǵanda 2,5 esege kóp.
«Keleshekte kepildendirilgen transfert boiynsha kontrtsikldyq qaǵidany qoldaný úshin Biýdjet kodeksine tiisti túzetýler qabyldandy. Kepildendirilgen transfert munaidyń konservativtik baǵasy kezinde munai sektorynan Ulttyq qorǵa túsetin túsimder mólsherinen aspaityn kólemde aiqyndalatyn bolady. Iaǵni orta merzimdi kezeńde transfert somasy birtindep qysqaratyn bolady. Bul munaiǵa qatysty emes tapshylyqtyń tómendeýine jáne Ulttyq qordyń ósýine yqpal etedi», - dedi ministr.
