Memleket óziniń áleýmettik mindettemelerin tolyǵymen oryndady. Bul týraly Parlament palatalarynyń birlesken otyrysynda Qarjy ministri Erulan Jamaýbaev málim etti, dep habarlaidy QazAqparat.
«Úkimet esebi Parlamenttiń Májilisi men Senatynda egjei-tegjeili qaraldy. Esepti qaraý kezinde ekonomikanyń barlyq salalary boiynsha 500-den astam suraqtar men usynystar berildi. Olar jumys toptarynda jáne salalyq komitetterde jetkilikti talqylandy. Parlament depýtattarynyń usynymdary Úkimet jumysynda eskeriletin bolady.
Respýblikalyq biýdjettiń negizgi parametrleri tolyq atqaryldy. Biýdjet túsimderi 12 trln 49 mlrd teńgeni nemese josparǵa 100,3 paiyzdy qurady. Iaǵni jospar oryndaldy. Shyǵystar 98,3 paiyzǵa igerildi jáne 14 trln 234 mlrd teńge boldy», - dedi E. Jamaýbaev Úkimet pen Esep komitetiniń 2020 jylǵa arnalǵan respýblikalyq biýdjettiń atqarylýy týraly esepterin qaraý kezinde.
Biýdjet tapshylyǵy 2 trln 185 mlrd teńgeni nemese jalpy ishki ónimniń 3,1 paiyzyn qurady.
«Ekonomikalyq ósýdi qalpyna keltirý jónindegi Keshendi jospar der kezinde ázirlenip, qabyldandy. Bul jumys oryndary men iskerlik belsendilikti saqtaýǵa múmkindik berdi. Respýblikalyq biýdjettiń atqarylýy týraly Esep komiteti Úkimettiń esebine birqatar eskertýler men usynymdar berdi. Esep komiteti salyqtyq ákimshilendirý máselelerine erekshe nazar aýdardy. Atap aitsaq, qosymsha salyq túsimderiniń 7 esege tómendeýi týraly eskertý boldy. Shyn máninde, 2020 jylǵa arnalǵan naqtylanǵan respýblikalyq biýdjette qosymsha salyq túsimderiniń josparly kólemi 1,5 trln teńgeni emes, 476 mlrd teńgeni quraǵan. Bul rette, Esep komiteti salyqtyq jáne kedendik tekserýler men kameraldyq baqylaý nátijeleri boiynsha ǵana qosymsha túsimderdi eskeredi. Alaida fiskaldyq organdar qoldanatyn sharalar áldeqaida keń jáne onyń ishinde ákimshilendirýdegi tsifrlyq qoldanýdy da qamtidy. Salyqtyq jáne kedendik sharalar esebinen is júzinde qosymsha túsimder 710 mlrd teńge. Bul ótken jyly qoldanylǵan tekserýlerge moratoriige jáne bizneske usynylǵan salyqtyq jeńildikterge qaramastan bolyp otyr», - dedi ministr.
Onyń sózine qaraǵanda, osylaisha is júzinde daǵdarys jaǵdaiynda qosymsha túsimder kóleminiń azaiýyna jol berilmei, kerisinshe, bekitilgen josparly kiris kólemi 1,5 ese asyra oryndaldy.
