Respýblikalyq biýdjettiń kiristeri 2022 jyly 9,2 trln teńgeni quraidy. Bul týraly Úkimet otyrysynda QR Qarjy ministri Erulan Jamaýbaev málim etti, dep habarlaidy QazAqparat tilshisi.
«Sizderdiń qaraýlaryńyzǵa «2022 - 2024 jyldarǵa arnalǵan respýblikalyq biýdjet týraly» Zań jobasy usynylyp otyr. Zań jobasy biýdjet zańnamasynyń sońǵy ózgeristerin eskere otyryp, elimizdiń 2025 jylǵa deiingi áleýmettik-ekonomikalyq damý boljamy negizinde ázirlendi. Bul árbir azamattyń ál-aýqatyn jaqsartýǵa jáne ekonomikany birtindep qalpyna keltirýge baǵyttalǵan. 2022 jyly túsimder biyldyń josparymen salystyrǵanda 431 mlrd teńgege ulǵaia otyryp, 13 trln teńge deńgeiinde boljandy. Munaily emes túsimder 1,8 trln teńgege nemese 25,1%-ǵa ulǵaiýmen qarastyryldy», - dedi E. Jamaýbaev.
Onyń aitýynsha, munaidan túsetin túsimderdi birtindep Ulttyq qordyń qarajatyn jinaqtaý rejimine oralýǵa bailanysty 1,3 trln teńgege tómendetý qarastyrylǵan.
«Ulttyq qordan kepildendirilgen transfert kelesi jylǵa 2,4 trln teńge mólsherinde anyqtaldy, ol birtindep 2024 jyly 2,0 trln teńgege deiin tómendeidi. Nátijesinde, munaily emes túsimderdiń úlesi aǵymdaǵy jyly 56,4%-dan 2024 jyly 71,4%-ǵa deiin ósetin bolady», dedi ministr.
«Respýblikalyq biýdjettiń kiristeri 2022 jyly 9,2 trln teńgeni, 2023 jyly-
9,7 trln teńgeni, 2024 jyly 10,4 trln teńgeni quraidy. Biýdjet tapshylyǵy 2022 jyly jalpy ishki ónimniń 3,3%-nan kezeń-kezeńmen 2024 jyly jalpy ishki ónimniń 2,5%-na deiin tómendeýimen josparlanǵan. Bul rette munaily emes tapshylyq kórsetilgen kezeńde jalpy ishki ónimniń 8,1%-nan 6,3%-ǵa deiin tómendeidi», - dedi vedomstvo basshysy.
