Qorǵanys ministrliginde Táýelsizdik kúnine arnalǵan onlain formatta saltanatty jinalys ótti, dep habarlaidy "Ult aqparat" Qorǵanys ministrliginiń baspasóz qyzmetine silteme jasap.
Aita keterligi, Táýelsizdik kúni qarsańynda Prezident Jarlyǵymen Qarýly kúshterde barlyǵy 45 áskeri qyzmetshi nagradtaldy. Áskeri-teńiz kúshteriniń bas qolbasshysy kontr-admiral Sáken Bekjanov II-shi dárejeli «Dańq» ordenimen, aviabaza komandiriniń orynbasary podpolkovnik Ivan Gavrilko II-shi dárejeli «Aibyn» ordenimen marapattaldy.
«Elbasynyń strategiialyq sheberliginiń, kóregendi de syńdarly saiasaty men parasattylyǵynyń arqasynda Qazaqstan óńirdegi eń turaqty el bolyp qalyptasty. Qazaqstan Respýblikasynyń Prezidenti – Qarýly Kúshterdiń Joǵarǵy Bas Qolbasshysy Qasym-Jomart Kemeluly Toqaevtyń basshylyǵymen elimizdiń qorǵanys qabileti udaiy nyǵaiýda», - dedi Qorǵanys ministri Nurlan Ermekbaev saltanatty jiynda.
Jiynda kózge túsken áskeri qyzmetshilerge memlekettik nagrada tabys etildi. Joǵary kórsetkishi men úlgili qyzmeti úshin ministrdiń buiryǵymen 14 ofitserge merziminen tys áskeri ataq berildi.
2019 jyldan beri ótkizilip kele jatqan «Ásker tarlany» konkýrsynyń qorytyndysy shyǵaryldy.
Atalǵan konkýrstyń qorytyndysy boiynsha 24 úzdik áskeri qyzmetshige estelik músin, diplom men aqshalai syilyq tabys etildi.
Qorǵanys vedomstvosynyń basshysy Qarýly kúshterdiń 2020 jylǵy nátijesin atap ótti. Armiia koronavirýs pandemiiasyna qarsy is-sharalarǵa belsendi qatysty, ári qarqyndy damýyn jalǵastyrýda.
Áýe shabýylyna qarsy qorǵanystyń, radioelektrondyq kúrestiń, áskeri-kólik aviatsiiasynyń qazirgi zamanǵy quraldarymen jaraqtandyrý iske asyrylyp jatyr. Áskerge jańa qarý-jaraq kelip túsýde, qoldanystaǵy áskeri tehnika jóndeledi jáne jańartylady.
Qazirgi qarýly qaqtyǵystardyń tájiribesin zerdeleý negizinde áskerlerdi daiarlaý jetildiriledi. Arnaiy operatsiialar kúshterin damytý máseleleri basty nazarda. Oqytý baǵdarlamasyna armiialyq taktikalyq atys engizildi, armiialyq qoian-qoltyq urys boiynsha sabaqtarmen qamtý keńeitildi.
Áskeri ǵylym men ratsionalizatorlyq jumys jetildiriledi. Áskeri mamandar drondarǵa qarsy qarýdyń, pilotsyz ushý apparattarynyń, oqý trenajerlarynyń úlgilerin ázirledi.
Sybailas jemqorlyqqa qarsy kúreste qoldanǵan júieli sharalar biýdjet qarajatyn iri kólemde qymqyrýǵa jol bermeýge, jemqorlyqpen quqyq buzýshylyqtar sanynyń jáne sol sebepti sottalǵan áskeri qyzmetshilerdiń yń azaiýyna múmkindik berdi.
Áskeri qyzmetshilerdi tárbieleý protsesine olardyń tynys-tirshiliginiń barlyq salalaryn qamtityn sitýatsiialyq keisteri bar 50 oqý modýli engizilgen.
Komandirdiń derbestigi men bastamasyn kótermeleý, áskeri qyzmetshilerdiń moraldyq-psihologiialyq jai-kúiin arttyrý boiynsha sharalar qabyldandy.
