Qazaqstandaǵy 216,7 myń zeinetkerge birjolǵy qarjylai kómek kórsetiledi. Bul týraly Eńbek ministrliginiń baspasóz qyzmeti habarlady.
Qarttar kúni aiasynda Nur-Sultanda, sondai-aq Aqmola, Aqtóbe, Atyraý, Qaraǵandy, Mańǵystaý, Pavlodar, Soltústik Qazaqstan, Túrkistan oblystarynyń jekelegen aýdandarynda 216,7 myń adamdy qamtityn 2,3 mlrd teńge kóleminde birjolǵy qarjylai kómek kórsetiledi.
Jalpy, aǵymdaǵy jyly, jergilikti biýdjet múmkindikterin eskere otyryp jáne biznestiń áleýmettik jaýapkershiligi sheńberinde 15,2 mlrd teńgeden astam qarajat bólindi (onyń ishinde jergilikti biýdjetten - 14,2 mlrd teńge, tartylǵan qarajat esebinen - 1 mlrd teńge):
- Uly Otan soǵysyndaǵy Jeńis kúnine bir rettik materialdyq kómekke - 7,6 mlrd teńge (123,6 myń adam);
- azyq-túlik sebetin berýge - 1 mlrd 481,1 mln teńge (233,4 myń adam);
- jeńildikpen dári-dármekpen qamtamasyz etýge - 174,2 mln teńge (40,8 myń adam);
- tisti protezdeýge - 142,7 mln teńge (3 myń adam);
- shipajailyq emdelýge - 1 mlrd 362,3 mln teńge (19,5 myń adam);
- turǵyn úidi jóndeýge - 46,4 mln teńge (376 adam);
- otynmen qamtamasyz etýge - 136,1 mln teńge (3,7 myń adam);
- qoǵamdyq kólikte jeńildikpen júrýge - 740,7 mln teńge (133,9 myń adam);
- kómektiń basqa túrlerine - 3 498,8 mln teńge (134,0 myń adam).
Aita ketsek, elimizde 2 millionnan astam zeinetker turady. Ár azamattyń laiyqty qarttyq shaǵyn qamtamasyz etýge qamqorlyq jasaý - áleýmettik saiasattyń basty mindetteriniń biri.
