Otandyq tanymal aqyn Balǵynbek Imash elimizde koronavirýs infektsiiasyna qarsy vaktsinany salý máselesine qatysty óz oiyn aitty. Óner iesi elimizde ekpeni májbúrli túrde saldyrtyp jatqanyn alǵa tartyp, óz janaiqaiyn jetkizdi dep jazady "Ult aqparat".
Balǵynbek Imash vaktsinaǵa degen narazylyǵyn óziniń Instagram paraqshasynda bildirdi. Aitysker aqyn indetke qarsy ekpege túbegeili qarsy ekenin ashyq aityp, vaktsinatsiianyń erikti túrde ótpei jatqanyna shúilikti.
"Vaktsina saldyrý erikti túrde degen bos sóz bolǵany ma? Bizdiń biliktiń sózine senýge bolmaityn siiaqty. "Mektep direktorlaryn "qamshylaý" kerek" degen ne masqara? Qaidasyńdar, batyr qazaqtyń erleri men qyzdary? Eldiń kóz-jasyna qalýdan qorqatyn basshy qalmaǵan ba? Mekeme basshylary! Ár túrli deńgeidegi ákim-qara, sheneýnik, direktor, rektor, t.b qyzmettegi azamattar! Allanyń aldynda qol astylaryńdaǵy ár adamnyń haqynan suralasyńdar!
Vaktsina aldym dep jahanǵa jar salǵan jelidegi jarnamashylar! Ne úshin? Eshkim qystamasa, ótinbese, suramasa, talap etpese, belgisiz ekpeni ne úshin, kim úshin nasihattap jatyrsyńdar? Ramazan aiy ǵoi. Ótirik aqtalmańdar! Alla júrekterińdegi syrdy biledi. Kóbiń kreslo úshin, basshyǵa jaǵý úshin saldyrdyńdar! Densaýlyq úshin emes! Bárińniń júrekterińde kúmán bar! Kóbiń táýekelge bardyńdar.
Ózińniń artyń shydamady, maqul. Endi basqalardy zorlamasańdarshy! Maǵan dairektke jazyp jatqandar jetedi. "Amal joq, joǵarynyń buiryǵymen, qoqan-loqqysymen saldyrýǵa májbúrmiz" deidi. Óz erkimen saldyrǵandarǵa qarsy aitarym joq. Biraq, olardyń sany az ǵoi. Kóbi amalsyz saldyrýda. Men ekpege qarsymyn! Búgin "halyq jaýy" qylsańdar da osy pikirde qalamyn. Qaida meniń Ata Zańymmen kepildik berilgen quqyǵym?" , - dep jazdy Balǵynbek Imash.
Sonymen qatar, sóz sońynda ol memleket basshysy Qasym-Jomart Toqaevqa úndeý jasady.
"Men, sondai-aq, LGBT-nyń nasihatyna, jerimizdiń talan-tarajǵa túsýine, otbasymnyń tárbiesine qol suǵylýyna, dini senim bostandyǵyma qol suǵylýyna, ulttyq sal-dástúrimdi "eskilik, jabaiylyq" sanalýyna, Ana tilimniń tuqyrtylýyna qarsymyn! Bas sanitardyń sheshimi, Densaýlyq ministrliginiń buiryǵy - Ata zańymdaǵy quqyǵymnan joǵary emes! Qurmetti, Qasym-Jomart Kemeluly! Siz memleket basshysy retinde osy eldegi árbir zańbuzýshylyqty tiiýǵa, jol bermeýge tiistisiz", - dedi ol.
