Olimpiadaǵa 5 joldama jeńip aldyq eken dep, bosańsýǵa áli erte. Bul týraly bokstan Ulttyq quramanyń bas bapkeri Ǵalymbek Kenjebaev aitty.
Tilshimiz osy kúnderi Olimpiadaǵa irikteý týrniri ótip jatqan Iordaniianyń Amman qalasynda júrgen bas bapkerge áleýmettik jeli arqyly habarlasqan edi, dep jazady QazAqparat agenttigi.
- Ǵalymbek Qaliuly, keshegi kún, iaǵni Nursultan ýaqytymen 8 naýryzdan 9 naýryzǵa qaraǵan tún ózińiz baptaityn boksshylar úshin asa sátti bolǵany belgili. Sharshy alańǵa shyqqan 5 boksshyńyzdyń beseýi de Olimpiadaǵa joldama aldy. Qýanyshyńyzben bólise ketseńiz...
- Árine, bul ulken jetistik. Biraq, Olimpiadaǵa 5 joldama jeńip aldyq eken dep, bosańsýǵa áli erte. Búgin de litsenziiaǵa talasatyn úsh boksshymyz bar. Sondyqtan, jarys aiaqtalmai jatyp, bórkimizdi aspanǵa atýǵa bolmaidy.
- Amman qalasyna attanar aldynda qansha joldama alý josparlanǵan edi?
- Negizi, 6 joldamaǵa qol jetkizsek degen josparymyz bolǵan. Al, jospardy artyǵymen oryndap jatsaq, nur ústine nur bolar edi.
- Jalpy irikteý týrniri qalai ótip jatyr? Qalǵan úsh litsenziiaǵa qol jetkizý múmkindigimiz jaily aita ketseńiz?
- Bul jai týrnirlerdiń biri emes, Tokioǵa joldamalar sarapqa salynyp jatqan doda. Sondyqtan barlyq eldiń boksshylary joǵary daiyndyqpen kelgen. Uiymdastyrý jaǵy da joǵary deńgeide. Ózderińiz tikelei efirden kórip jatqan bolarsyzdar, qarsylastarymyzdyń osaly joq. Endi qalǵan úsh boksshymyz joldama úshin baryn salatyny anyq. Al litsenziia utyp alǵandary altyn medal úshin aianbai judyryqtasady degen úmittemiz.
- Alǵashqyda Olimpiadaǵa irikteý týrniri Qytaida ótýi tiis edi. Alaida, koronavirýstyń órshýine bailanysty ótetin ornymen qatar, ýaqyty da ózgerdi. Bul ózgeristerdiń boksshylarǵa keri áseri boldy ma?
- Joq, eshqandai keri áseri bolyp jatqan joq. Boksshylarymyz ózgeristerge bailanysty babyn joǵaltqan joq. Barlyǵy ózimizdiń josparymyz boiynsha ótip jatyr.
- Áńgimeńizge rahmet! Tolyq quramda joldama jeńip alýǵa tilekshimiz....
Eske salaiyq, 8 naýryzdan 9 naýryzǵa qaraǵan túni erler quramasynan 5 boksshymyz Olimpiada litsenziiasyn jeńip aldy. Olar - 69 keli salmaqta Abylaihan Júsipov, 81 keli salmaqta Bekzat Nurdáýletov, 91 keli salmaqta Vasilii Levit, 75 keli salmaqta Ábilhan Amanqul jáne asa aýyr salmaqta (+91) el namysyn qorǵap jatqan Qamshybek Qońqabaev.
Áielder quramasynan Tokioǵa ázirge Nadejda Riabets baratyny belgili.
