Qaraǵandy oblysy Qarqaraly aýdanynda 2 ret dala órti shyqty. Qutqarýshylar olardyń birin aýyzdyqtap úlgerdi. TJD qyzmetkerleri ekinshi órtpen áli de kúresip jatyr, dep habarlaidy "Ult aqparat".
Qazirgi ýaqytta Qarqaraly aýdanynda dala órtiniń 2 jaǵdaiy tirkelip otyr. Yntaly aýylynan soltústik-batysqa qarai 15 shaqyrym qashyqtyqta 49 gektar aýmaqta qurǵaq shóp janǵan. Órt 14 tamyz kúni 21:30-da aýyzdyqtaldy. Ony sóndirýge oblystyq TJD-nyń 10 qyzmetkeri men 2 tehnika, erikti órt sóndirý qurylymdarynan 12 qyzmetker men 3 tehnika tartyldy.
Ekinshi órt Edrei aýylynan soltústik-shyǵysqa qarai 45 shaqyrym qashyqtyqta shyqqan. Jalyn sharpyǵan aýmaq anyqtalyp jatyr. Ony sóndirýge erikti órt sóndirý qurylymdarynan 17 qyzmetker men 5 tehnika jumyldyryldy.
Sondai-aq, Shet (2 órt), Aqtoǵai jáne Nura aýdandarynda dala órti tutanyp jatyr.
Ótken táýlikte Shet, Abai, Buqar Jyraý jáne Osakarovka aýdandarynda 11 dala órti aýyzdyqtaldy. Onyń aýmaǵy 5-48 gektar aralyǵyn qamtidy.
Eske salaiyq, keshe Qaraǵandy oblysynyń ákimi Erlan Qoshanov TJ rejimi jariialanǵan Qarqaraly aýdanyna bardy.
