Ulttyq qoǵamdyq senim keńesiniń 2-otyrysynda aitylǵan usynystar tolyqtai oryndaldy. Bul týraly Ulttyq qoǵamdyq senim keńesiniń 3-otyrysynda QR Prezidentiniń keńesshisi Erlan Karin aitty, dep habarlaidy QazAqparat.
«Elimizde tótenshe jaǵdai rejiminiń engizilýine qaramastan Ulttyq qoǵamdyq senim keńesiniń músheleri aýqymdy jumys júrgizdi. Eń aldymen Ulttyq keńestiń músheleri Memleket basshysynyń 2-otyrysta bergen tapsyrmalaryn iske asyrý boiynsha jumystarǵa belsene qatysty. Berilgen tapsyrmalardy iske asyrý maqsatynda QR Prezidenti Ákimshiliginiń basshysy 21 tarmaqtan turatyn arnaiy is-sharalar josparyn bekitken bolatyn. Osydan keiin memlekettik organdar jáne Ulttyq keńes músheleri birlese otyryp, berilgen baǵyttardy júzege asyrýǵa kiristi. Ásirese, zań jobalary boiynsha jumys toptaryndaǵy talqylaýlarǵa qatysý Ulttyq keńes músheleriniń negizgi jumys bóligin qurady», - dedi ol.
QR Prezidenti keńesshisiniń atap ótýinshe, Erlan Sairov, Muhtar Taijan, Asylbek Qojahmetov, Ashat Sadyrbai, Marat Báshimov, Murat Ábenov beibit jinalystar, saiasi partiialar jáne sailaý týraly zań jobalary boiynsha jumys toptarynyń talqylaýlaryna kún saiyn qatysyp, óz usynystaryn engizip otyrdy. Jalpy alǵanda mundai shamamen 20 talqylaý ótkizildi. Sonymen qatar Ulttyq keńes músheleriniń qatysýymen Parlamentte parlamenttik oppozitsiia institýtyn engizý, Qylmystyq kodekstiń 130-babyn dekriminilizatsiialaý, 174-bapqa ózgerister engizý boiynsha basqa da zań jobalary qarastyryldy.
«Olar daǵdarysqa qarsy jumystyń túrli baǵyttaryna da tartyldy. Erlan Sairov pen Aidos Sarym Elbasy N.Nazarbaevtyń bastamasymen koronavirýsqa qarsy kúres jaǵdaiynda áleýmettik osal toptarǵa qoldaý kórsetý úshin qurylǵan «Birgemiz» qorynyń qamqorshylyq keńesine kirdi. Oǵan qosa, elimizdiń óńirlerinde koronavirsqa qarsy iske asyp jatqan kúres sharalarynyń tiimdiligi Ulttyq keńes músheleriniń tarapynan únemi baqylaýda boldy», - dedi Erlan Karin.
Onyń aitýynsha, máselen, Marat Shibutovtyń suranymy negizinde Almaty qalasyndaǵy júk tasymaly boiynsha keibir máseleler túzetilip, jaqsartyldy. Aidos Sarym BAQ jumysynyń jekelegen suraqtary jáne turmystyq zorlyq-zombylyq jaǵdailarynyń ósýi boiynsha másele kóterdi. Al Asylbek Qojahmetov Aqmola oblysyndaǵy jedel shtab jumysymen tanysty. Prezident keńesshisi Baǵdat Mýsinniń jetekshiligimen qurylǵan jumys toby mektep oqýshylaryn qashyqtan oqytý protsesin tiimdi uiymdastyrý jumystaryna atsalysty.
«Nátijesinde búgingi kúnge deiin Memleket basshysynyń Ulttyq qoǵamdyq senim keńesiniń 2-otyrysynda bergen tapsyrmalaryn iske asyrý boiynsha is-sharalar josparynyń 11 baǵyty tolyqtai iske asty. Oǵan qosa birqatar zańnamalyq aktilerdiń jobalary QR Parlamentinde talqylaýdan ótýde. Sondyqtan Ulttyq keńes músheleri daiyndaǵan usynystardyń negizgi bóligi iske asty deýge bolady», - dede QR Prezidentiniń keńesshisi.
