Ulttyq qoǵamdyq senim keńesiniń aiasynda sarapshylar Qazaqstan óńirlerinde aýyl ákimderin tikelei sailaýyn ótkizý barysyn talqylady, dep habarlaidy QazAqparat.
Is-sharaǵa UQSK músheleri, QR Parlament Májilisiniń depýtattary, belgili qazaqstandyq saiasattanýshylar men áleýmettanýshylar qatysty.
Sharany QR Prezidentiniń kómekshisi, Ulttyq keńes hatshysy Erlan Qarin ashty.
«Reformalar men dialog - prezidenttik kýrstyń negizgi baǵyttarynyń biri. Máselen, saiasi bastamalardy júzege asyrý aiasynda ǵana qazirgi tańda 10 zań qabyldandy. Olardyń ishinde aǵymdaǵy jyldyń mamyr aiynda Memleket basshysy «Qazaqstan Respýblikasyndaǵy sailaý týraly» QR Konstitýtsiialyq zańyna ózgerister men tolyqtyrýlar engizý týraly» QR Konstitýtsiialyq zańyna jáne «Qazaqstan Respýblikasynyń keibir zańnamalyq aktilerine sailaý máseleleri boiynsha ózgerister men tolyqtyrýlar engizý týraly» QR zańyna qol qoidy. Sonyń nátijesinde biylǵy jyldyń ekinshi jartyjyldyǵynan bastap respýblika boiynsha 811 aýyldyq okrýgte ákimderdiń sailaýy ótti. Sailanǵan ákimderdiń 86% saiasi partiialardyń úmitkerleri. Taǵy 14% ózin-ózi usynǵan úmitkerler. Sonymen birge, sailanǵan ákimderdiń jartysy (51%) sailaýǵa deiin bul qyzmetterdi atqarmaǵan jańa adamdar» – dep atap ótti ol jiyn barysynda.
UQSK jáne Prezidenttik jastar kadr rezerviniń birlesken zertteý tobynyń jetekshisi Aleksandr Danilov 4 oblystyń (Pavlodar, Qostanai, Túrkistan jáne Shyǵys Qazaqstan) aýyl ákimderiniń sailaýy ótken aýyldyq okrýgterine barý negizinde daiyndalǵan taldamalyq baiandamany usyndy.
Baiandamada aýyldaǵy turǵyndardyń negizgi túitkildi máseleleri, aýyl ákimderin tikelei sailaýdyń qysqasha qorytyndylary jáne sailaý naýqanynyń erekshelikteri kórsetilgen.
Aleksandr Danilov óz sózinde aýyldyq okrýg ákimin tikelei sailaýyna bailanysty aýyl turǵyndarynyń jalpy pikiri jaqsy ekenine nazar aýdardy.
Zertteý barysynda úmitkerlermen júrgizilgen suhbattar nátijesi saiasi partiialar jumysynyń jandanǵanyn, sondai-aq úmitkerler ýájdemeleriniń jetkilikti joǵary deńgeiin, sailaý naýqany mehanizmderi men taktikasyn jaqsy túsingenderin kórsetti.
Sonymen birge, budan buryn Mańǵystaý, Soltústik Qazaqstan jáne Qaraǵandy oblystarynda UQSK músheleriniń kóshpeli otyrystary aiasynda aýyl ákimderiniń tikelei sailaýyna daiyndyq barysy men aýyldardy damytý máseleleri talqylanǵan bolatyn.
Murat Ábenov, Tóleýtai Raqymbekov, Marat Bashimov jáne Maksim Rojin óńirlerge barǵan saparlaryna qatysty óz baǵalarymen bólisti.
Sondai-aq, óńirlerden kelgen UQSK músheleri Lázzat Qojahmetova, Bórihan Nurmuhamedov, Tattygúl Talaeva, Ýais Ersaiynuly jáne Aigúl Orynbek jergilikti jerlerde aýyl ákimderin sailaýdyń erekshelikterine toqtaldy.
Talqylaý qorytyndysy boiynsha sarapshylar aýyl ákimderin tikelei sailaý tetigin jetildirý boiynsha birqatar usynystar berdi.
Ulttyq qoǵamdyq senim keńesiniń aldaǵy altynshy otyrysynda da aýyl ákimderi sailaýyn ótkizý boiynsha usynystar toptamasy usynylady.
