QR Prezidentiniń kómekshisi Erlan Qarin búgin Memleket basshysy qol qoiǵan Adam quqyqtary jónindegi ýákilge qatysty zańdarǵa qatysty pikir bildirdi, dep habarlaidy QazAqparat.
«Búgin Memleket basshysy adam quqyqtaryn qorǵaý salasyndaǵy eki mańyzdy qujatqa qol qoidy. Olardyń birinshisi –«Qazaqstan Respýblikasynyń keibir zańnamalyq aktilerine ólim jazasynyń kúshin joiý máselesi boiynsha ózgerister men tolyqtyrýlar engizý týraly» Zań. Al ekinshisi – «Qazaqstan Respýblikasyndaǵy Adam quqyqtary jónindegi ýákil týraly» Zań», - dep jazdy ol Telegram kanalynda.
Onyń aitýyna qaraǵanda, atalǵan zańdar Prezidenttiń saiasi reformalarynyń paketindegi negizgi qujattardyń qataryna jatady.
«Atap aitqanda, Qylmystyq kodekstiń normalaryn azamattyq jáne saiasi quqyqtar týraly halyqaralyq paktige ekinshi Fakýltativtik hattamanyń erejelerimen úilestirý qajettiligi týraly osy jyldyń qyrkúiegindegi Prezident Joldaýynda aityldy.
Alaida, osy ózgeristerdi kózdeitin zań jobasyn talqylaý barysynda memlekettik organdardyń ókilderi men quqyq qorǵaýshylar arasynda pikirtalas týyndady. Nátijesinde, Ulttyq qoǵamdyq senim keńesiniń altynshy otyrysynda eki taraptyń ustanymyn qarastyra otyryp, Prezident ólim jazasynyń kúshin joiý normasy qandai da bir eskertpesiz qabyldanýǵa tiis ekenin atap ótip, osy másele boiynsha quqyq qorǵaýshylardyń ustanymyn qoldady», - deidi Erlan Qarin.
Al Adam quqyqtary jónindegi ýákil týraly derbes zań ázirleý týraly bastamany Qasym-Jomart Toqaev biyl qańtar aiynda, QR Parlamentiniń VII shaqyrylymynyń birinshi sessiiasynyń ashylýynda jariialaǵan bolatyn.
«Bul zań Adam quqyqtary jónindegi ombýdsmenniń quqyqtyq mártebesin alǵash ret aiqyn anyqtap, quzyretin aitarlyqtai keńeitedi. Osylaisha, atalǵan zańdardyń qabyldanýy adam quqyqtaryn qorǵaý jáne saiasi jańǵyrý salasyndaǵy Prezident baǵytynyń birizdiligin kórsetedi.
Budan bólek atalǵan qujattarǵa qol qoiý qoǵam ókilderi men bilik institýttary arasyndaǵy dialogtyń tiimdiligin kezekti ret kórsetip otyr. «Qazaqstan Respýblikasyndaǵy Adam quqyqtary jónindegi ýákil týraly» Zańnyń jekelegen normalaryn qoǵam ókilderi men quqyq qorǵaýshylar Ulttyq qoǵamdyq senim keńesiniń alańynda birneshe ret talqylaǵanyn atap ótken jón», - dep jazdy Prezidenttiń kómekshisi.
