Foto Tengrinews.kz/Alihan Sariev
Politsiia, ákimshilik ǵimarattaryna, áleýmettik nysandarǵa shabýyldaý – ekstremizmniń belgisi. Bul týraly QR Memlekettik hatshysy Erlan Qarin málim etti, dep habarlaidy QazAqparat.
«Taiaýda ótken brifing barysynda Almaty qalalyq politsiia departamentiniń bastyǵy ońtústik astanadaǵy oqiǵalardyń órbýine qatysty tolyq hronologiiany usyndy. Onyń sózinde qarýly shabýyldarǵa, oiran salý men tártipsizdikterge jalpy 20 myńǵa deiin adam qatysqany atap ótildi. Árine, bul radikaldardyń qatysýymen oryn aldy. Oiran salý, politsiia, quqyq qorǵaý organdarynyń ǵimarattaryna shabýyl jasaý, ákimshilik ǵimarattardy basyp alý, beibit turǵyndarǵa, áleýmettik nysandarǵa, onyń ishinde aýrýhanalarǵa shabýyldaý – munyń barlyǵy zorlyq-zombylyq ekstremizminiń belgileri», - dedi Memlekettik hatshy «Habar 24» telearnasyna bergen suhbatynda.
Onyń atap ótýinshe, dál osyndai zorlyq-zombylyq is-áreketterin aqtaýǵa bolmaidy.
«Kóptegen ózge elde, onyń ishinde Eýropadada mundai, taǵy da qaitalap aitamyn, zorlyq-zombylyq is-áreketteri zorlyqshyl ekstremizm jáne terrorizm dep birjaqty sipattalady. Bul jalpy qabyldaǵan anyqtama. Sondyqtan bul jerde qandai da bir pikirtalas bolmaýy kerek siiaqty. Memlekette de, qoǵamda da bir ǵana ádis bolýy tiis. Nelikten mundai ádis bolýy tiis? Biz mundai is-árekettiń jolyn kesýimiz qajet. Mundai zorlyq-zombylyq ideologiiasyna, zorlyqshyl ekstremizm ideologiiasyna tosqaýyl qoiýymyz kerek. Bul oqiǵalar terrorizm aktisi retinde sózsiz baǵalanýy tiis»,- dedi Erlan Qarin.
Memlekettik hatshynyń atap ótýinshe, terrrorimdi nanym-senim júiesi retinde qaramaý kerek. Terrorizm – bul halyqty úreilendirý jáne qorqytý strategiiasy, ádisi.
