QR Prezidentiniń kómekshisi Erlan Qarin elimizdiń BUU-nyń Adam quqyqtary jónindegi keńesiniń quramyna kirýine qatysty pikir bildirdi, dep habarlaidy QazAqparat.
«14 qazanda BUU Bas assambleiasynyń sheshimimen Qazaqstan 2022-2024 jyldary BUU-nyń Adam quqyqtary jónindegi keńesiniń quramyna kirdi. Atalǵan keńeske Qazaqstannyń múshe bolyp sailanýy – quqyq qorǵaýshylarymyz ben memlekettiń adam quqyǵyn qorǵaý salasynda kúsh-jigerin moiyndaýy. Qazaqstan kandidatýrasyn qaraý barysynda Prezident Qasym-Jomart Toqaevtyń Joldaýlary men Jarlyqtarynda belgilegen, qabyldanyp jatqan barlyq is-sharalar eskerildi. Memleket basshysynyń ótken jylǵy jáne osy jolǵy Joldaýlarynda quqyq qorǵaý taqyryby jeke bólim boldy. Al osy jyldyń maýsymynda Prezident quqyq qorǵaý salasyn keshendi jańǵyrtýǵa baǵyttalǵan «Qazaqstan Respýblikasynyń adam quqyqtary salasyndaǵy jekelegen is-sharalary týraly» Jarlyqqa qol qoidy», - dep jazdy Erlan Qarin Telegram kanalynda.
Onyń atap ótýinshe, Qazaqstanyń BUU Adam quqyqtary jónindegi keńesiniń jumysyna qatysýy memlekettiń munan ary da quqyq qorǵaý máselelerine nazar aýdara otyryp, adam quqyqtaryn qorǵaý salasyndaǵy ózge de kóptegen problemany munan ary ózektendirip, sheshýge septigin tigizedi.
