Aýdandyq mańyzy bar qalalar men aýyldardyń ákimderin sailaýǵa 2297 úmitker tirkeldi. Bul týraly Qazaqstan Respýblikasy Prezidentiniń kómekshisi Erlan Qarin jazdy, dep habarlaidy "Ult aqparat".
«14 shildede aýdandyq mańyzy bar qalalardyń, aýyldardyń, kentterdiń jáne aýyldyq okrýgterdiń ákimdigine kandidattardy tirkeý aiaqtaldy. Respýblika boiynsha sailaýǵa qatysý úshin jalpy 2582 adam óz kandidatýrasyn usyndy, onyń 2297-si nemese 88,9% qajetti tirkeýden ótti. Saiasi partiia kandidattary – 878 adam (38,2%)», - dep jazdy E. Qarin Telegram jelisindegi paraqshasynda.
Prezident kómekshisi elimizdiń barlyq 6 saiasi partiiasy aýyl ákimdigine óz kandidattaryn usynǵanyn atap ótti.
Sondai-aq, úmitkerlerdiń kópshiligi, tirkelgenderdiń 1419-y nemese 61,8%-y – ózin-ózi usynǵandar.
«Iaǵni, jańa normalar belsendi azamattar úshin óz áleýetin iske asyrýǵa qosymsha múmkindik berdi. Munyń bári Prezidenttik saiasi reformalardyń qoǵamda úlken qyzyǵýshylyq týdyrǵanyn kórsetedi», - deidi Erlan Qarin.
Eske sala ketsek, 25 shildede elimiz boiynsha 730 eldimekenniń ákimi tikelei sailaý arqyly anyqtalady.
El tarihynda ákimder sailaýy alǵash ret 14 óńirde birdei ótkeli tur. "Ult aqparat" agenttigi osy aýyldardyń tizimin usyndy.
2021 jyldan bastap aýyl ákimderiniń tikelei sailaýyn ótkizý týraly Prezident Qasym-Jomart Toqaevtyń «Jańa jaǵdaidaǵy Qazaqstan: is-qimyl kezeńi» atty Joldaýynda tapsyrma berilgen bolatyn.
