Biyl alǵash ret elimizde aýyl ákimderiniń sailaýy ótti. Osy oraida sailanǵan aýyl ákimderiniń 50%-dan astamy osy laýazymǵa jańadan kelip otyr eken. Bul týraly QR Prezidentiniń kómekshisi Erlan Qarin málim etti, dep habarlaidy QazAqparat.
«Aýyl ákimderin sailaýy shildedegi sharýamen bitken joq. Ár apta saiyn elimizdiń belgili bir aýylynda ákim sailaýy ótip jatyr. Búginde elimizde 2300-den astam aýyl ákimi bar. Biyl shilde de 730 aýyldyń ákimi sailandy. Odan beri taǵy 100 aýyldyń basshysy qaita tańdaldy. Osylai jalǵasa beredi. Óitkeni, sailaý aýyl ákiminiń qyzmettik merzimine bailanysty ótedi. Osy oraida sailanǵan aýyl ákimderiniń jańarýy 52 paiyzdy qurap otyr. Iaǵni ákimderdiń 50 paiyzdan astamy jańa adamdar. Mysaly, keshe ǵana jańalyqtardan oqydym Talǵardyń ákimi bolyp dáriger maman sailanǵan», - dedi Erlan Qarin «Habar 24» telearnasyna bergen suhbatynda.
Sondai-aq, Prezident kómekshisi ózin-ózi usynyp, halyqtyń qoldaýyna ie bolyp sailanǵan aýyl ákimderiniń de baryn aitty.
«Osylaisha Memleket basshysynyń bul reformasy el basqarýǵa nietti azamattar men aýyl halqynyń únimen sanasýǵa múmkindik berdi. Sailaýdan bólek, aýyl ákimdigi apparaty qyzmetkerleriniń biliktiligin jetildirýde nazardan tys qalǵan joq. Qazirgi ýaqytta 1 myńnan astam qyzmetker óz bilimin jetildirdi. Sonymen qatar aýyl ákimderiniń jalaqysy da ósti. Buryn olardyń ailyǵy 130 myń teńgeni qurasa, qazir 400 myń teńgege jýyqtaidy», - deidi ol.
