Memlekettik keńesshi Erlan Qarin Facebook paraqshasynda Ahmet Baitursynulynyń 150 jyldyq mereitoiynyń jospary týraly baiandady, dep habarlaidy "Ult aqparat".
"Búgin Oqý-aǵartý, Ǵylym jáne joǵary bilim ministrlerimen birge Ahmet Baitursynulynyń 150 jyldyq mereitoiyn atap ótý barysyn talqyladyq.
Jyl basynan beri Alash ardaqtysynyń beinesin, esimin dáripteý, ult jadynda qaldyrý maqsatyndaǵy kóptegen is-sharalar uiymdastyryldy. IýNESKO, TÚRKSOI sekildi halyqaralyq uiymdar aiasynda da birqatar ǵylymi-aǵartýshylyq baǵyttaǵy jiyndar ótkizý josparda bar. Mysaly, erteń Halyqaralyq Túrki akademiiasy Ǵylymi keńesiniń V otyrysy bolady. Sonyń sheńberinde A.Baitursynulynyń mereitoiyna arnalǵan konferentsiia ótedi.
Ulttyq quryltaida aqyn Svetqali Nurjan ult ustazynyń mereitoiy qarsańynda atqarylýy qajet birneshe usynys aitqan bolatyn. Ol usynystar jalpyrespýblikalyq jospardy júzege asyrý barysynda qaralatyn bolady" - dep jazdy Qarin.
Sondai-aq ol Ulttyq quryltaidyń bir top múshesimen jumys kezdesýin ótkizgenin, oǵan úkimettik emes uiymdar men qoǵamdyq birlestikterdiń ókilderi qatysqanyn jetkizdi.
"Onda Ulttyq quryltaidyń birinshi otyrysynda Memleket basshysy bergen tapsyrmalardyń oryndalý barysyn talqyladyq. Onyń ishinde Quryltai qosymshasynyń ázirlenýi jóninde sóz qozǵaldy. Bul platforma árbir azamatqa áleýmettik mańyzdy máseleler boiynsha ideialar men bastamalardy usynýǵa múmkindik beretin bolady.
Sonymen qatar, áriptesterimizben birge aldaǵy jumysymyzdyń formatyn belgiledik. Mundai kezdesýler Ulttyq quryltaidyń basqa da múshelerimen ótetin bolady" - dep túiindedi Memlekettik keńesshi.
