"QR Premer-Ministri Kárim Másimov jumys sapary barysynda Pavlodar áýejaiynyń qaýipsizdik júiesimen tanysty", - dep habarlady Pm.kz.
Elimizde, ásirese, mańyzdy mekemelerde, adamdar kóp jinalatyn jerlerde qaýipsizdik sharalaryn qamtamasyz etý jáne kúsheitý qajettigi týraly Qazaqstan Prezidenti Nursultan Nazarbaev 10 maýsymda Aqtóbede jáne 18 shildede Almatyda oryn alǵan oqiǵalarǵa bailanysty ótken Qaýipsizdik keńesi otyrysynda aitqan edi.
«Basqa elder úlgisinde barlyq áýejailardy, avto jáne temirjol vokzaldaryn zamanaýi tekserý júielerimen, aýlalardy - sapaly beinebaqylaýmen qamtamasyz etý qajet. Bul sharalardyń barlyǵy azamattarǵa qolaisyzdyq týǵyzbaýy tiis», - dep atap ótti Memleket basshysy.
Jumys barysynda terrorizm qateri faktoryn eskerýmen qaýipsizdik sharalaryn kúsheitý týraly nusqaý barlyq tiisti uiymdarǵa, onyń ishinde Qazaqstannyń áýejailary men áýe kompaniialaryna jiberildi.
Aimaqtarǵa sapary barysynda K.Másimov kólik infraqurylymy qaýipsizdigin qamtamasyz etý máselelerin erekshe baqylaýyna alady. Osyǵan deiin Premer-Ministr Aqtóbe, Qaraǵandy, Taldyqorǵan, Qostanai áýejailaryn tekserip, Petropavl qalasynyń áýejaiyn jóndeýden ótkizý jumysymen tanysty.
Pavlodarda K.Másimov áýejaidyń kútý zalyn, jolaýshylar men júkterdi tekserý oryndaryn aralap shyqty. QR Premer-Ministrine áýejaidyń injenerlik-tehnikalyq beriktigi men lańkestikke qarsy qaýipsizdigi týraly baiandaldy.
«Pavlodar áýejaiy» AQ 1972 jyly paidalanýǵa berilgen, 2011 jyly ol qaita jóndeýden ótti. Qazirgi tańda áýejaida Almaty, Astana, Máskeý, Sankt-Peterbor, Minsk, Sochi, Antaliia jáne basqa da ishki jáne halyqaralyq baǵyttar boiynsha turaqty reister qamtamasyz etiledi.
Aerovokzal saǵatyna 200 jolaýshyny, al terminal saǵatyna 100 jolaýshyǵa deiin ótkize alady. Áýejai kesheni qajetti arnaiy tehnikamen jabdyqtalǵan jáne áýe kemelerine qyzmet kórsetetin, jolaýshylar jáne ushý-qoný jolaǵy men perron jumysyn qamtamasyz etetin personaldar qarastyrylǵan.
.jpeg)