Qarashyǵanaq munai-gaz kondensaty ken orny aýmaǵynda karantin jariialandy, dep habarlaidy "Ult aqparat".
BQO bas memlekettik sanitar dárigeriniń 23 mamyrdaǵy qaýlysyna sáikes «Qarashyǵanaq Petroliým Opereiting b.v.» kompaniiasy aýmaǵynda 5 maýsymǵa deiin karantin rejimi engizildi.
Kenish aýmaǵynda jumys isteitin qyzmetkerler men óndiristik qyzmetke tartylǵan, azyq-túlik taýarlary, dári-dármek, janar-jaǵar mai jáne basqa qajetti materialdardy tasymaldaityn kólik quraldaryn qospaǵanda, kólik quraldarynyń kirip-shyǵýyna tyiym salyndy.
Barlyq kólik quraldarynda ilespe qujattary bolýy, sanitarlyq óńdeýden ótip, tirkelýi tiis.
Túngi aýysymda jumys isteitinderdi, olardy tasymaldaityndardy, ákimdik, quqyq qorǵaý organdary, jedel járdem, sanitarlyq-epidemiologiialyq, órt sóndirý, apattyq jáne basqa ómirlik qamtamasyz etý nysandary qyzmetkerlerin qospaǵanda, adamdardyń vahtalyq qalashyqtardyń ishinde, olardyń arasynda keshki saǵat 19.00-den tańǵy 07.00-ge deiin júrip-turýyna tyiym salyndy.
Kenishke jańadan keletin eńbek migranttary oqshaýlaný talaptaryn saqtai otyryp, ózge qyzmetkerlerden bólek ornalasatyn bolady.
Bórli aýdany ákimdigi provizorlyq jáne karantindik statsionarlar qyzmetin, oǵan jatqyzylatyn adamdardy tasymaldaýdy qamtamasyz etip, barlyq vahtalyq qalashyqta túsinik jumystaryn júrgizedi, shekteý sharalaryn buzýshylyq oryn alǵan jaǵdaida óz quzyreti sheginde shara alady.
Sondai-aq kenish aýmaǵynda sanitarlyq-dezinfektsiialyq jumystar júrgizilip, barlyq tazalyq jáne saqtyq sharalary qolǵa alynady.
Eske sala keteiik, budan buryn Oral qalasynda balabaqshalardyń qyzmeti qaita toqtatylǵanyn, úsh adamnyń jansaqtaý bóliminde jatqanyn jazǵan bolatynbyz.
