Aýyl sharýashylyǵy ministri Erbol Qarashókeev qazaqstandyq sharýalardyń otstavkaǵa ketý týraly talabyna jaýap berdi, - dep habarlaidy Tengrinews.kz tilshisi.
Aýyl sharýashylyǵy ministrligi basshysy "bul sailanbaly emes, taǵaiyndalǵan qyzmet bolǵandyqtan" Úkimet músheleri otstavkaǵa ketýge árqashan daiyn bolýy kerek ekenin aitty.
"Naqty maǵan kelsek, qazir aýyl sharýashylyǵyn reformalaý qajet ekenin eshkim daýlamaidy. Kez kelgen reformaǵa qarsy tarap ta, jaqtaýshy tarap ta bolatyny sózsiz. Men barlyq tarappen syndarly dialogqa ashyqpyn. Taraptar málimdemesine túsinikpen qaraimyn", - dedi aýyl sharýashylyǵy ministri.
Erbol Qarashókeev reformalardyń egjei-tegjeiin talqylaý úshin sharýalarmen kezdesýler belsendi júrgizilip jatqanyn aitty.
"Keshe óńirlerden kelgen sharýalarmen oflain kezdesý ótkizdim. Aitpaqshy, dál osy kezdesýde 30 qatysýshynyń biri meniń otstavkaǵa ketýimdi usyndy. Bul kezdesý tórt saǵattan asa ýaqytqa sozyldy. Eger jýrnalister talqylaýǵa sońyna deiin qatyssa, onda olar kezdesý sońynda biz reformalar qajettiligi týraly ortaq túsinikke kelgenimizge kóz jetkizer edi", - dedi ministr.
Buǵan deiin Qazaqstannyń ár óńirinen kelgen sharýalar aýyl sharýashylyǵy ministri Erbol Qarashókeevtiń otstavkaǵa ketýin talap etkeni habarlanǵan edi.
