Úkimet otyrysynda QR Aýyl sharýashylyǵy ministri Erbol Qarashókeev kóktemgi dala jumystaryna biýdjettik kreditti ulǵaitýdy surady, dep habarlaidy QazAqparat tilshisi.
«Ótken jylǵy qurǵaqshylyq, sondai-aq qosalqy bólshekter, janar-jaǵarmai, mineraldy tyńaitqyshtar men pestitsidter baǵalarynyń kúrt ósýi aldaǵy kóktemgi egisti ýaqtyly daiyndaý jáne sapaly júrgizý úshin eleýli qiyndyqtar týǵyzýda. Osyǵan bailanysty, fermerlerge qoldaý kórsetý maqsatynda respýblikalyq biýdjetti naqtylaý kezinde kóktemgi dala jumystaryna biýdjettik kreditti ulǵaitý múmkindigin qarastyrýdy suraimyz», - dedi Erbol Qarashókeev.
Onyń dereginshe, aýyl sharýashylyǵy taýaryn óndirýshilerdi kóktemgi dala jumystaryn júrgizýge naryqtyq baǵadan 15 paiyzǵa tómen baǵamen keminde 380 myń tonna arzandatylǵan dizel otynymen qamtamasyz etý máseleleri sheshilýde. Otandyq mineraldy tyńaitqysh óndirýshilermen aýyl sharýashylyǵy eńbekkerleriniń qajettilikterin tolyq qamtamasyz etý týraly ýaǵdalastyqqa qol jetkizildi. Tuqym, tyńaitqysh pen pestitsid satyp alýdy sýbsidiialaýǵa 2022 jyly 70 mlrd teńge kózdeldi.
«Oblystardyń derekteri boiynsha 2022 jyly aýyl sharýashylyǵy daqyldaryn 22,9 mln gektar alańǵa egý josparlanýda. Bul 2021 jylǵy deńgeiden 13,5 myń gektarǵa kóp. Oblys ákimdikteri agrotehnologiialardy saqtaý, ylǵal resýrstaryn únemdeý tehnologiialaryn qoldaný ólshemsharttaryn mindetti túrde saqtai otyryp, olardy keńinen qoldaný arqyly qolda bar ylǵal qorlaryn saqtaý, uqypty paidalaný sharalaryn qabyldaýy qajet. Jalpy kóktemgi dala jumystaryna daiyndyq josparly rejimde júrip jatyr», - dedi ministr.
