Búgin QR Aýyl sharýashylyǵy ministri Erbol Qarashókeev «Azamattarǵa arnalǵan úkimet» memlekettik korporatsiiasy júzege asyratyn Qazaqstan Respýblikasynyń Memlekettik jer kadastryn júrgizý qyzmetimen tanysty. Bul týraly vedomostvonyń baspasóz qyzmeti habarlady.
Ministrge búgingi tańda topyraq, geobotanikalyq zertteý, topyraq bonitetin anyqtaý boiynsha jumystar júrgizilip jatqany baiandaldy.
Alynǵan topyraqty zertteý materialdaryn salystyrmaly taldaý elde topyraq qunarlylyǵynyń tómendeýi men jaiylymdyq jerlerdiń tozý úrdisi kúsheiip kele jatqanyn kórsetedi.
Negizgi sebep – jer paidalanýshylardyń jer zańnamasynyń negizgi talaptaryn saqtamaýy. Eger mundai úrdis jalǵasa berse, 2040 jylǵa qarai dándi daqyldardyń ónimdiligi shamamen 15%-ǵa tómendeýi múmkin, dep boljam jasady korporatsiiadaǵylar.
«Aqparattyq júielerdi shoǵyrlandyrý arqyly «Jyljymaityn múliktiń biryńǵai memlekettik kadastry» aqparattyq júiesin (MJK AAJ, JMT MDQ) qurý jáne engizý» jobasy aiasynda Biryńǵai memlekettik jyljymaityn múlik kadastryn ázirleýdiń tehnikalyq bóligi aiaqtalǵany baiandaldy. Bul jobany engizý jer qory jáne jyljymaityn múlik obektileri týraly aqparattyń ashyqtyǵyn jáne halyqqa qoljetimdiligin qamtamasyz etýge múmkindik beredi.
Korporatsiia qyzmetiniń nátijelerimen tanysqan Aýyl sharýashylyǵy ministri topyraq qunarynyń nasharlaýy eń aldymen jer paidalanýda oryn alǵan júieli problemalarǵa bailanysty ekenin atap ótti.
«Atap aitqanda, zamanaýi tsifrlyq tehnologiialarǵa negizdelgen, jerdi paidalaný protsesterine, jalǵa alýshylardyń jer zańnamasynyń talaptaryn qalai oryndaitynyna naqty baqylaý júrgizetin memlekettiń naqty quraly áli joq.
Ekinshi jaǵynan jalǵa alýshynyń Jer kodeksinde qarastyrylǵan mindettemeleri jaldaý sharttarynda kórsetilmegen. Osyndai tehnikalyq kemshilikter de bar. Bul jaýapsyz jer paidalanýshylarmen jaldaý shartyn buzý úshin dálelderdi jyldam jinaýdy qiyndatady.
Bul tek egistik jerlerge ǵana emes, jaiylymdyq jerlerge de qatysty. Sondyqtan búgingi tańda bizdiń aldymyzda osy júielik problemany qysqa merzimde sheshý mindeti tur.
Osyǵan bailanysty, qazirgi ýaqytta Ministrlik egis ainalymdarynyń saqtalýyna naqty baqylaý júrgizý, jaiylymdardyń tozý dárejesin anyqtaý úshin ǵaryshtyq monitoringti jáne Jerdi qashyqtan zondtaýdy paidalana otyryp, egistikterdegi ósimdikterdiń túrin aiqyndaýdyń zamanaýi ádistemesin ázirleý máselelerin pysyqtaýda.
Ekinshi jaǵynan, jer paidalanýshynyń árbir jer ýchaskesi boiynsha topyraqtyń jai-kúii týraly turaqty negizde naqty aqparat bolýy úshin respýblikalyq Agrohimiialyq qyzmettiń múmkindigin zamanaýi ádistemege kóshirý josparlanýda.
Osy máselelerdi sheshý arqyly ǵana biz jerdi paidalaný protsesterine naqty baqylaý jasap, basty bailyǵymyz jerdi baqylaýsyz jáne óreskel zańbuzýshylyqpen paidalanatyndardy toqtata alamyz. Bul bizdiń vedomstvonyń eń ózekti mindetteriniń biri», - dedi ministr.
