«Qarapaiym zattar ekonomikasy» jobalarynyń sany 900-den 2600-ge deiin, iaǵni 2,5 ese artty. Bul týraly QR Premer-Ministri Asqar Mamin aityp berdi, dep habarlaidy QazAqparat.
«Qarapaiym zattar ekonomikasy» baǵdarlamasy otandyq óndiristi damytýdyń investitsiialyq quraly bolyp, óz tiimdiligin dáleldedi. Osyǵan bailanysty Memleket basshysynyń tapsyrmasyna sáikes, baǵdarlamany jalpy qarjylandyrý kólemi 1 trln teńgege deiin ulǵaityldy. Pandemiiaǵa qaramastan jobalardyń sany 900-den 2600-ge jetip, 2,5 eseden astam óskenin kórip otyrmyz, al olardyń somasy 3,5 esege artyp, 216 mlrd teńgeden 700 mlrd teńgege jetti. Osy jobalardy iske asyrý nátijesinde jumys oryndarynyń sany 20 myń bolady dep josparlanyp otyr», - dedi A. Mamin Úkimettiń búgingi otyrysynda.
Baǵdarlama importty almastyrýǵa jáne halyq tutynatyn taýarlar men qyzmetterdiń óndirisin damytýǵa baǵyttalǵan naqty jobalardy iske asyrýǵa múmkindik berdi.
Sonymen birge retteletin satyp alýdaǵy jergilikti qamtý da - mańyzdy másele.
«Otandyq taýar óndirýshilerdi qoldaý jóninde tiimdi sharalar ázirlendi, sonyń nátijesinde jergilikti qamtý úlesi ótken jylmen salystyrǵanda 2 ese ósip, 1,5 myńnan astam otandyq kásiporyndardy qoldaýǵa múmkindik berdi. Bul jalpy ónerkásipti damytýdy qamtamasyz etýge jáne jańa jumys oryndaryn qurýǵa múmkindik berdi. Ónim satyp alýda jergilikti qamtýdyń joǵary ósý serpini baiqalyp otyrǵan salalardy atap ótsek, olar: jeńil ónerkásip – 38-den 68% deiin, jihaz ónerkásibi – 39-dan 71% paiyzǵa deiin, tamaq ónerkásibi – 41-den 74% paiyzǵa deiin, qurylys materialdary – 34-ten 71% paiyzǵa deiin artqan», - deidi Úkimet basshysy.
Óńirler boiynsha aldyńǵy qatarda Qostanai, Qaraǵandy, Shyǵys Qazaqstan, Almaty jáne Túrkistan oblystary tur.
«Sonymen qosa, Mańǵystaý, Atyraý, Jambyl, Batys Qazaqstan oblystarynyń ákimdikteri tarapynan tiisti jumys júrgizilmegen, osy oblystarda keibir salalar boiynsha jergilikti qamtý úlesi 24-ten 43%-ǵa deiingi aralyqty qamtidy. Bul jerde ákimdikterdiń jumysyn jandandyrý kerek», - dedi Premer-Ministr.
