Densaýlyq saqtaý ministri Aleksei Tsoi Qazaqstandaǵy karantin sharalarynyń nátijesi týraly aityp berdi, dep habarlaidy "Ult aqparat".
«Qazir jaz. Kóktemdegi qiyn jaǵdailardan keiin eldiń sharshaǵanyn bárimiz túsinemiz. Alaida maska rejimin saqtaý – asa qajetti shara. Halyqaralyq tájiribeni esepke ala otyryp, keshe ǵana biz maska taǵýǵa qatysty erejelerge tyń ózgerister engizdik. Atap aitqanda bes jasqa deiingi balalarǵa, jeke sporttyq jattyǵý jasap júrgen azamattarǵa, jalpy tamaqtanatyn oryndarda tamaq ishý barysynda maska taǵýǵa mindettemeý týraly ózgeris kúshine endi. Alaida bul jaǵdailarda áleýmettik qashyqtyq saqtalýy kerek», - dedi Aleksei Tsoi OKQ-da ótken baspasóz máslihatynda.
Onyń aitýynsha, sanitarlyq talaptardy kúsheitýdiń arqasynda sońǵy úsh aptada eldegi barlyq aimaqta aýrý juqtyrý jaǵdaiy edáýir azaiǵan.
«Ortasha eseppen elde aýrý juqtyrýdyń táýliktik tirkelý jaǵdaiy eki jarym ese azaidy», - dedi ol.
