20 sáýirden bastap elordada ónerkásip kásiporyndary, óndiris oryndary jumystaryn qaita jandandyra bastaǵan bolatyn. Osyǵan orai BAQ ókilderi jumysyn bastaǵan óndiris oshaqtarynda qyzmetkerlerdiń qaýipsizdigi qalai qamtamasyz etilip jatqanyn kórip qaitty, dep habarlaidy QazAqparat.
«Qala ákimshiliginen 20 sáýirden bastap jumys isteýge ruqsat aldyq. Karantindik saqtyq sharalaryn barynsha qabyldap, jumysymyzdy bastap kettik. Jalpy óndiris ornymyzda 20-dan astam jumys isteidi. Biraq, sanitarlyq talaptardy eskerip, eki aýysymda 5 adamnan óndiriske shyǵyp júr. Jumysshylarymyzdy meditsinalyq maskamen, qolǵappen, zalalsyzdandyratyn suiyqtyqpen qamtamasyz etip otyrmyz. Olar maskany aýysym barysynda úsh ret aýystyrady», - dedi elordalyq tilshiler eń aldymen at basyn tiregen «Lashyn faktori» JShS-nyń tehnikalyq direktory Samat Nurmanov.
Kompaniia munaraly krandar men qurylysqa arnalǵan liftiler qurastyrýmen ainalysady. Óndirisin endi bastaǵan kompaniia birinshi kezeńde 600 mln, ekinshi kezeńde 1 mlrd teńge investitsiia quiyp, ónimderin kórshi elderge de eksportqa shyǵarýdy josparlap otyr. Kompaniia biikti 40, jebesi 56 metr bolatyn krandar qurastyrmaq.
«Qazaqstanda munaraly kran men óndiristik lifti shyǵarylmaidy. Al qurylys kompaniialarymyzdyń qajettiligi import esebinen qanaǵattandyrylyp otyr. Sondyqtan iportalmastyrýshy kompaniiaǵa ainalyp, elimizdiń qurylys kompaniialaryn óz ónimderimizben qamtamasyz etýdi josparlaýdamyz. Keleshekte ónimderimizdi Orta Aziia elderine, Aýǵanstanǵa eksporttaýdy da oilastyrýdamyz. Biz jylyna 100 kran qurastyra alamyz», - dedi ol.
«GLB» úi qurylys kobinaty da karantin kezinde óndiriske ruqsat berilgennen keiin jumysshylarynyń qaýipsizdigine basa nazar aýdaryp otyr. Kombinattyń baqylaý-ótkizý pýnkti kúzetshileri óndiris aýmaǵyna ár adamnyń dene qyzýyn ólshep qana ótkizedi. Sonymen qatar betke meditsinalyq maska taǵyp, qolǵa qolǵap kiiý de mindetti. Kombinattyń ár jerine zalalsyzdandyrý suiyqtyǵy qoiylǵan.
«Sanitarlyq-epidemiologiialyq qyzmet usynǵan barlyq qaýipsizdik talaptaryn qatań ustap otyrmyz. Kún saiyn jumysshylarymyzdy arnaiy bólingen 6 avtobýspen alyp kelip, qaita úilerine jetkizip otyrmyz. Avtobýstar kúndelikti zalalsyzdandyrylady. Jumysshylar jii shoǵyrlanatyn jerler kúni boiy jýylady. Buǵan qosa, zalalsyzdandyrýshy kásiporyndarmen kelisimshart jasadyq. Olar kún saiyn 2 804 sharshy metr aýmaqty zalalsyzdandyrady», - dedi «GLB» JShS-nyń basqarýshy direktory Eldar Qasymov.
Eske sala keteiik, QR Prezidenti janyndaǵy Tótenshe jaǵdai rejimin qamtamasyz etý memlekettik komissiiasy 20 sáýirden bastap Nur-Sultan jáne Almaty qalalarynda jumysyn bastaityn kásipkerlik sýbektileriniń tizimin bekitti. Tizimde ónerkásiptik kásiporyndar, qurylys jáne jol-qurylys salalarynyń kompaniialary, iri qurylys dúkenderi, kólik, qoima kompaniialary, aýyl sharýashylyǵy maqsatyndaǵy servistik kompaniialar, avtosalondar, TQS, avto jýý, dóńgelek aýystyrý servisi, avtobólshekter dúkenderi, himiialyq tazalaý, keńse tehnikasyn jóndeý jáne ekinshi deńgeili bankter bar.
