Densaýlyq saqtaý ministri Aleksei Tsoi karantin shekteýlerin jii buzatyn óńirlerdi atady, dep habarlaidy QazAqparat.
«Halyq arasynda virýstyń qaýiptiligine senbeitin adamdar bar, olar úilený toilaryn, banketterdi jeke úiler men kottedjderde ótkizýdi jalǵastyryp keledi. Monitoring toptarynyń engizilgen shekteý sharalary men eskertýlerine qaramastan, sanitariialyq-epidemiologiialyq talaptardy saqtamai jumys istep turǵan nysyndardy anyqtaý jalǵasýda», - dedi ministr Ortalyq kommýnikatsiialar qyzmetinde.
Onyń aitýynsha, naýryzda shekteý is-sharalaryn, karantin talaptarynyń saqtalýyn baqylaý maqsatynda 16 030 reid júrgizildi.
«Osy oraida 102 966 nysan tekserildi, onyń ishinde 2864 nysan ákimshilik sharalarǵa qaramastan, belgilengen shekteý talaptaryn, jumys rejimin buzýdy jalǵastyryp keledi, iaǵni buqaralyq is-sharalar ótkizip jatyr. 3021 ákimshilik is qozǵaldy», - dedi Tsoi.
Onyń sózine qaraǵanda, mundai nysandar myna óńirlerde kóp tirkeldi: Shyǵys Qazaqstan oblysynda, Almaty qalasynda, Shymkent qalasynda anyqtaldy.
«Búgingi tańda elimizde karantindik sharalardy qasaqana buzǵan 512 adam anyqtaldy. Óńirler boiynsha Shymkent qalasy, Nur-Sultan qalasy, Almaty qalasy, Jambyl oblysy, Qostanai oblysy, Pavlodar oblysy kósh bastap tur. 512 quqyq buzýshynyń arasynda 486-sy shaǵyn biznes ókili, tórteýi orta kásipkerlik nysany jáne 22 jeke tulǵa bar», - dep naqtylady ministr.
