Sairamdyq politseiler karantin kezinde qonaqtar shaqyryp, toi ótkizip jatqan turǵyndardy anyqtady, dep habarlaidy Polisia.kz.
Túrkistan oblysynyń politseileri karantin talaptarynyń saqtalyp, onyń oryndalýy barysynda qarqyndy jumys júrgizýde.
Osyndai kezekti jumys kúninde Sairam APB-ne Mankent aýylyndaǵy turǵynnyń biri óz úiinde 50-den astam azamattardy jinap, kelin túsirý toiyn ótkizip jatqandyǵy týraly habarlama kelip tústi.
Aqparat alysymen atalmysh meken-jaiǵa aýdandyq politseiler men ákimdik qyzmetkerlerinen qurylǵan mobildik top tez arada jetip, tekserý jumystaryn júrgizdi.
Nátijesinde politseiler yǵy-jyǵy adam jinalǵan toidy toqtatty. Karantin talaptaryn saqtamai, óreskel quqyq buzǵany úshin toi iesine QR ÁQBtK-niń 425-babyna sáikes «Halyqtyń sanitarlyq-epidemiologiialyq salaýattylyǵy salasyndaǵy zańnama talaptarynyń, sondai-aq gigienalyq normativterdiń buzylýy» hattama toltyryldy.
Jinaqtalǵan aqparattar sheshim qabyldaý úshin tiisti organǵa jiberildi. Aýdanda osyǵan uqsas taǵy eki jait tirkeldi. Onyń birinde jergilikti turǵyn óz úiine 20-dan astam adam jinap, kelin túsirgen. Al kelesi turǵyn 15-ten astam adam jinap, qyz uzatý toiyn ótkizgen. Bul eki jaitta da mobildik top shuǵyl jetip, adamdardyń kóptep shoǵyrlanýyna jol bermei, toi-jiyndardy toqtatqan.
