«Sary» aimaqtaǵy karantindik shekteýdi eskermegender «Missis Aqtóbe» baiqaýyn uiymdastyrdy. Qazir oblystyq sanitariialyq-epidemiologiialyq baqylaý departamenti BAQ-ta jariialanǵan materialdy tekserip jatyr, dep habarlaidy QazAqparat.
Aqtóbe oblysy qazir «sary» aimaqta tur. Ótken táýlikte óńirde 50 adamnan koronavirýs infektsiiasy anyqtaldy. Onyń 40-y virýstyń simptomdy túrine shaldyqqan.
Onyń kóbi Aqtóbe qalasynyń, ózgesi Muǵaljar, Alǵa, Oiyl, Temir aýdandarynyń turǵyny. Aýrý kórsetkishiniń ósý deńgeii 1% qurady.
Aqtóbe óńirlik kommýnikatsiialar qyzmetinde ótken baspasóz máslihatynda oblystyń bas sanitar dárigeri karantin kezinde baiqaý ótkizgenderge qatysty túsinik berdi.
«Bul úlken sharany ótkizý úshin ruqsat alǵan eshkim bolmady. Aqtóbe qalalyq sanitariialyq-epidemiologiialyq baqylaý basqarmasy men oblystyq sanitariialyq-epidemiologiialyq baqylaý departamentinen ruqsat berilmedi. BAQ estigen soń mádeniet basqarmasy men monitoring topq suranys jiberildi. Olardan shaǵym tússe, tekserý júrgizilip, uiymdastyrýshyǵa ákimshilik shara qoldanylady», - dedi oblystyq sanitariialyq-epidemiologiialyq baqylaý departamentiniń basshysy Nursulý Berkimbaeva.
Aita keteiik, oblys boiynsha barlyǵy 4854 jaǵdai tirkelse, onyń 90% jazyldy.
Naýqastarmen qarym-qatynasta bolǵan 1 myńǵa jýyq adam úi karantininde.
Olar eki apta dáriger baqylaýynda bolady. Qańtarda 26, aqpanda 33, naýryzda 63 oqýshydan koronavirýs infektsiiasy anyqtalǵan.
Jyl basynan beri 34 muǵalimnen COVID-19 tirkeldi. Qańtarda 4, aqpanda 12, naýryzda 18 jaǵdai anyqtaldy.
«Qazir jansaqtaý bóliminde 13 naýqas jatyr. Onyń ekeýi ókpeni jasandy jeldetý apparatyna qosylǵan», - dedi oblystyq densaýlyq saqtaý basqarmasynyń basshysy Rústem Isaev.
