Karantin kezinde elimizdiń sybailas jemqorlyqqa qarsy qyzmetine júginýshiler sany artyp ketti. Bul týraly QR Sybailas jemqorlyqqa qarsy is-qimyl agenttigi qujat ainalymy basqarmasynyń basshysy Qýanysh Myrzaǵali aitty, dep habarlaidy QazAqparat.
«QR Sybailas jemqorlyqqa qarsyis-qimyl agenttiginiń Call-ortalyǵy azamattarǵa tegin aqparattyq qoldaý kórsetip, keńes beredi jáne olardyń shaǵymdaryn qabyldaidy. Jyl basynan beri Call-ortalyqqa shamamen 12 myń ótinim tústi. Onyń 400-den astamynda quqyq buzý belgileri bar. 44 is sotqa deiingi tergeýdiń biryńǵai tizilimine tirkelip, 8 qylmystyq is sotqa jiberildi. Onyń úsheýi boiynsha úkim shyqqan»,- dedi ol agenttiktiń Facebook paraqshasynda ótken onlain brifing barysynda.
Sonymen qatar ol ótken jyldan beri agenttik basshylyǵynyń azamattardy jeke qabyldaý kestesine ózgeris engizilgendigin atap ótti.
«Sybailas jemqorlyqqa qarsy is-qimyl agenttiginiń tóraǵasy azamattardy apta saiyn, basshylyq quram kúndelikti qabyldaidy. Osy jylydń 5 aiynda agenttik 561 jeke qabyldaý ótkizdi. 649 másele boiynsha 764 azamat júgindi. Kelip túsken máselelerdiń 35 paiyzy qanaǵattandyryldy. Indetke bailanysty azamattardy habyldaý shuǵyl máseleler boiynsha ǵana júzege asyrylyp jatyr. Azamattarǵa negizinen jazbasha shaǵymdaný, elektrondy ótinim jiberý arqyly júginýge keńes beriledi. Shaǵymdardyń qaralý barysyna únemi saraptama jasalyp otyrady. Agenttik tóraǵasy da bul máseleni ózi baqylaýǵa alǵan. Mine osyndai jan-jaqty sharalardyń nátijesinde shaǵymdar sany jyldan jylǵa artyp keledi. Osy jyldyń birinshi jartyjyldyǵynda shaǵymdar sany 26 paiyzǵa artyp, 4 725-ke jetip otyr»,- dedi Qýanysh Myrzaǵali.
Onyń dereginshe, karantin kezinde kelip túsetin shaǵymdar sany 2 ese artyp ketken. Al maýsym aiynda bir kúnniń ózinde azamattardan 76 shaǵym kelip túsken. Osy aralyqta elektrondy shaǵymdar sany da 2,5 ese artyp otyr.
