10 tamyzdan bastap elordanyń barlyq emhanalarynda aldyn ala jazylý boiynsha josparly túrde qabyldaý júrgizilip jatyr. Bul týraly Nur-Sultan qalasynyń qoǵamdyq densaýlyq saqtaý basqarmasynyń basshysy Timýr Muratov aitty, dep habarlaidy QazAqparat.
Timýr Muratovtyń aitýynsha, dárigerler eresekter men balalarǵa profilaktikalyq tekserý júrgizedi.
«Onyń ishinde skrining, josparly stomatologiialyq qyzmetter, ońaltý qyzmetteri, meditsinalyq-áleýmettik qoldaý, meditsinalyq-áleýmettik saraptamaǵa meditsinalyq qujattardy resimdeý, psihologiialyq kómek, kúndizgi statsionarlardyń jumysy, táýliktik jáne kúndizgi statsionarlarǵa josparly emdeýge jatqyzýǵa jiberý bar. Is-sharalar kúsheitilgen sanitarlyq-epidemologiialyq normalardy saqtai otyryp júrgiziledi. Jumys kúnderi saǵat 08:00-den 17:00-ge deiin», - dedi ol.
Sondai-aq onyń atap ótýinshe, koronavirýs infektsiiasy belgileri bar adamdardy qabyldaý boiynsha filtr-kabinettiń jumysy jalǵasýda. Qazirgi ýaqytta qalada táýligine 5,5 myń zertteý qýaty bar 9 PTR-zerthana jumys isteidi. Olarda barlyǵy 305 myńnan astam zertteý júrgizildi.
Ákimdik meditsina mekemelerine 600-den astam floýmetr, 500 ottegi kontsentratory, 500 arnaiy kerýet, jasandy tynys alý jáne kompiýterlik tomografiia apparattaryn jetkizdi. Shilde aiynda eki apta ishinde qalaǵa pnevmoniia, koronavirýs jáne basqa da aýrýlardy emdeýde qajet 110 tonnadan astam dári-dármek jetkizildi. Bul jumystardy ákimdik turaqty negizde júrgizedi.
