Aqtóbede politsiia qyzmetkerleri «VKontakte» áleýmettik jelisine monitoring júrgizip, tyiym salynǵan aýdiojazbalardy saqtaǵan eki aqtóbelikti anyqtady, dep habarlaidy QazAqparat.
Aqtóbe qalasynyń 28 jastaǵy eki turǵyny destrýktivti sipattaǵy aýdiojazbany saqtaǵan. Dini saraptama nátijeleri boiynsha aýdiojazba mazmuny Qazaqstan Respýblikasynyń aýmaǵynda tyiym salynǵany anyqtaldy.
«Sot sheshimimen eki aqtóbelik QR ÁQBtK-niń 453-babynyń 1-bóligi boiynsha ákimshilik jaýapqa tartylyp, buqaralyq aqparat quralynda jariialanǵan ónimi tárkilenip, árqaisysy 58 340 teńge mólsherinde ákimshilik aiyppul túrindegi jazaǵa tartyldy. Aqtóbe oblysynyń politsiia departamenti Qazaqstan Respýblikasynyń konstitýtsiialyq qurylysyn kúshtep ózgertýdi, onyń tutastyǵyn buzýdy, memleket qaýipsizdigine nuqsan keltirýdi, soǵysty, áleýmettik, násildik, ulttyq, dini, tektik-toptyq jáne rýlyq arazdyqty qozdyrýdy, qatygezdik pen zorlyq-zombylyqqa bas urýdy nasihattaýǵa nemese úgitteýge baǵyttalǵan málimetter men materialdary bar buqaralyq aqparat quraldarynyń ónimin daiyndaýǵa, saqtaýǵa, ákelýge, tasymaldaýǵa, taratýǵa tyiym salynatynyn eske salady», - dedi oblystyq PD baspasóz qyzmetiniń jetekshisi Erbolat Sarqulov.
