Qaraqalpaqstannyń Joǵarǵy keńesi Núkistegi oqiǵa boiynsha resmi málimdeme jasady, - dep habarlaidy Tengrinews.kz.
"Ózbekstan Respýblikasy júrgizip otyrǵan ashyqtyq jáne erkin erik bildirý saiasatyna qaramastan, 2022 jyldyń 1 shildesinde Núkis qalasynda qylmystyq top Qaraqalpaqstan Respýblikasynyń memlekettik basqarý organdaryn basyp alýǵa áreket jasaý túrindegi zańsyz áreketter uiymdastyrdy.
Popýlistik urandardy jamyla otyryp, azamattardyń sanasy men senimine aila-sharǵy jasap, tártipsizdikterdi uiymdastyrýshylar bilik ókilderiniń zańdy talaptaryna baǵynbai, azamattardy respýblikanyń ákimshilik ǵimarattary kesheniniń aldyndaǵy alańǵa jinady.
Arandatýshylar jinalǵan adamdarǵa súiene otyryp, osy memlekettik mekemelerdi basyp alýǵa jáne osylaisha qoǵamǵa iritki salýǵa, Ózbekstandaǵy qoǵamdyq-saiasi jaǵdaidy turaqsyzdandyrýǵa áreket jasady", - delingen habarlamada.
Parlament ókilderi zańsyz áreketterdiń joly kesilip, jappai tártipsizdik áreketteri aýyzdyqtalǵanyn atap ótti.
"Memleketimiz jaǵdaidyń odan ári ýshyǵýyna jol bermeý úshin qajetti áleýetke ie ekenin jaýapkershilikpen málimdeimiz. Tártipsizdikterdi uiymdastyrýshylar toby men quqyq qorǵaý organdaryna belsendi qarsylyq kórsetken adamdar ustaldy. Qazir olarǵa qatysty tergeý amaldary júrip jatyr. Barlyq arandatýshy anyqtalyp, qoldanystaǵy zańnamaǵa sáikes jaýapqa tartylady", - dep málimdedi Joǵarǵy keńes.
