Qaraǵandyda vaktsinatsiialaý pýnkterinde ekpe saldyrýǵa kelgenderdiń qarasy qalyń. Halyq erikti túrde ekpe salýǵa nietti. Búgingi kúni aimaq turǵyndarynyń jiyrma myńy vaktsina alyp úlgergen. Sáýir aiynyń sońyna deiin 217 myń adamǵa vaktsina salý kózdelýde.
Qaraǵandy turǵyndary vaktsina saldyrýdyń mańyzdylyǵyn túsinedi. Qalanyń ekpe salý oryndaryna vaktsina alýǵa kelgendermen tildesken edik, dep jazady Baq.kz agenttigi.
Nina Nikolaevna 73 jasta. Ekpe alý deniniń saýlyǵy úshin kerek ekendigin jaqsy túsinedi. Vaktsina saldyrýǵa kúieýi ekeýi birge kelgen.
Vaktsina saldyrý, ne saldyrmaý jaily suraq ta týyndamady. Halyqty jappai egý bastalǵanyn estigen bette birden emhanaǵa kelip, ekpe saldyrýǵa jazyldym. Búgin saǵat 12.00-de kelý kerektigin aitty. Aldymen saýalnama toltyrdym. Saýalnamada qazirgi kezdegi densaýlyq jaǵdaiy, sozylmaly aýrýlardyń bar joqtyǵy, sońǵy ýaqyttary virýs juqtyrǵandarmen bailanysqa túsken-túspegendigimiz jaily jáne basqa da suraqtarǵa jaýap berý qajet boldy. Odan keiin medbikeler qan qysymyn ólshedi. Ekpe alý kabinetinen keiin arnaiy baqylaý aimaǵynda 30 minýt dárigerdiń baqylaýynda bolamyn,- deidi Nina Nikolaevna.
Qaraǵandy qalalyq №3 emhananyń ǵimaratynda ashylǵan vaktsinatsiialaý ortalyǵy bir mezette 8 kabinette ekpe salady. Emhana basshylyǵynyń aitýynsha jalpyhalyqtyq vaktsinatsiialaý sáýir aiynda bastalǵan. Qazir munda kúnine 300-den astam turǵynǵa vaktsina salynady.
Ekpe salatyn kabinetter men baqylaý aimaǵyna beinekamera qoiylǵan. Vaktsinatsiialaý barysyn únemi kompiýterden qadaǵalap otyramyn. Erikti túrde ekpe saldyrǵysy keletin turǵyndardy sáýir aiynyń alǵashqy kúnderinen qabyldai bastadyq. Oǵan deiin meditsina qyzmetkerleri men pedagogtarǵa ekpe saldyq. Keshe 12 sáýirde 308 adam ekpe aldy,- deidi emhananyń direktory Saniia Boranqulova.
Ekpe saldyrýǵa kelgenderdiń biri - 26 jastaǵy Áigerim Jeksenbiqyzy. Vaktsina qazirgi pandemiia jaǵdaiynan shyǵýdyń birden-bir joly ekendigin aitady.
Ekpe saldyrýǵa 12 sáýirde «Damýmed» qosymshasy arqyly ótinish tastadym. Ótinishim birden qabyldanyp, búgin emhana kelý kerektigi jaily telefonyma habarlama keldi. Ekpeden keiingi jaǵdaiym qalypty, ázirge eshqandai janama áseri bolǵan joq. Úsh aptadan keiin «Spýtnik V» vaktsinasynyń ekinshi komponentin alamyn,- deidi qala turǵyny Á. Jeksenbi.
Qaraǵandy oblystyq densaýlyq saqtaý basqarmasynyń málimetinshe, búgingi tańda Qaraǵandy oblysynyń 20 656 turǵyny «Spýtnik V» vaktsinasynyń birinshi komponentimen jáne 8 175 adam ekinshi komponentimen egilgen.
Bizge 9 sáýirde 23 740 vaktsina jetkizildi. Qazirgi ýaqytta jalpyhalyqtyq vaktsinatsiialaýdy qarqyndy júrgizip jatyrmyz. Ekpeni erikti túrde saldyrǵysy keletin azamattardyń barlyǵyna ekpe salynatyn bolady. Turǵyndar «Damýmed» baǵdarlamasy, egov arqyly, sondai-aq emhanaǵa kelý arqyly ekpe alýǵa jazyla alady,- deidi basqarma basshysy Gamal Toqsanbaev.
Onyń aitýynsha, búgin-erteń aimaqqa vaktsinanyń 56 myń dozasy, al aidyń aiaǵyna deiin 87 myń dozasy jetkiziledi dep kútilýde. Sáýir aiynyń sońyna deiin 217 myń adamǵa vaktsina salynady dep josparlanýda.
Koronavirýstyq infektsiiany jeńýde vaktsina alýdyń mańyzdylyǵy joǵary. Iaǵni virýsqa qarsy vaktsina alǵan adamnyń aǵzasy virýspen kezdeskende aýrýdyń damýyna jáne asqynýyna, virýstyń ári qarai taralýyna jol bermeidi. Sondyqtan da vaktsina alý bul jaǵdaidan shyǵýdyń birden-bir joly ekendigin aitqym keledi, - deidi basqarma basshysy.
