Qaraǵandyda Osevaia kóshesinde otyrǵyzylǵan aǵashtar órtenip jatyr. Qatty jel saldarynan órtti sóndirýde qiynshylyqtar týyndady, dep habarlady Sputnik Qazaqstan agenttigi Ekaraganda.kz saityna silteme jasap.
Qaraǵandy ákimi Ermaǵanbet Bólekbaevtyń habarlaýynsha, qaýipti ýchaskede kólik qozǵalysy ýaqytsha toqtatylyp, turǵyndardy jaqyn mańdaǵy saiajai ýchaskelerinen evakýatsiialaý bastaldy. Qala ákimi órt sóndirýshilerdiń jumysy qatty jel saldarynan qiyndai túskenin atap ótti.
"Jedel shtab quryldy. Órtti sóndirýge TJD, orman sharýashylyǵy kúshteri jáne 10 tehnika jumyldyryldy. Jol ýaqytsha jabyldy. Saiajai turǵyndaryn evakýatsiialaý bastaldy. Jaǵdaidy baqylaýda ustaimyn", - dedi Qaraǵandy ákimi.
Basylymnyń málimetinshe, órt týraly habarlama 4 shildede 12:02-de túsken.
"Qaraǵandy orman jáne janýarlar dúniesin qorǵaý sharýashylyǵy" mekemesi mańynda shópter men aǵashtar jandy.
Aita keteri, 3 shilde kúni keshki ýaqytta Qaraǵandy turǵyndary tútinniń qatty iisine shaǵymdanǵan bolatyn. 30 sharshy metr aýmaqta avtomobil dóńgelekteri órtendi. Órt tútini búkil qalaǵa jaiyldy. Tótenshe jaǵdailar departamenti órttiń sol kúni keshki ýaqytta toqtatylǵanyn atap ótti. Qaza bolǵandar men zardap shekkender joq.
