Qaraǵandy oblysynyń ákimi m.a. Jeńis Qasymbek sýǵa batqan kólikten júkti áiel men balalardy qutqarǵan eki qaraǵandylyqqa 5 mln teńgeden berdi. Bul týraly ol jelidegi paraqshasynda jazdy.
«Prezidentimiz ulyqtaý rásiminde naǵyz qaharmandardyń halyq arasynda ekenin aitqan edi. Sonyń dálelindei bizdiń jerlesterimiz Orazaly Asylhanov pen Dýman Kákenov eki áiel men eki balany qutqaryp, olarǵa alǵashqy meditsinalyq kómek kórsetip, kásibi deńgeide áreket etti.
Buqar jyraý aýdanynyń turǵyny Dýman Kákenov sýǵa batyp bara jatqan kólikti kórip, osy kóliktiń jolaýshysy bolǵan Orazalyǵa jolaýshylardy qutqarýǵa baǵyttalǵan alǵashqy sharalardy iske asyrýǵa kómektesti.
Jedel qabyldanǵan sharalardyń arqasynda jerlesterimiz qaiǵyly jaǵdaiǵa jol bermedi. Soǵan bailanysty Dýman Kákenov pen Orazaly Asylhanovty árqaisysyn 5 mln teńge kólemindegi syiaqymen kótermeleý týraly sheshim qabyldadym. Sonymen qatar Orazalyny jumysqa ornalastyrýǵa járdem kórsetemiz. Buǵan qosa, Qaraǵandy oblysynyń TJD bul jigitterdi marapattaýǵa usynatyn bolady», - dep jazdy Jeńis Qasymbek.
Esterińizge sala keteiik, Qaraǵandy oblysynda jolaýshylary bar kólik muz astyna túsip ketken. Avtokólik salonynda eki áiel men eki sábi boldy.
