Áleýmettik jelide Qaraǵandy oblysy PD Kriminaldyq politsiia basqarmasy bastyǵynyń orynbasary Ermek Tobylbaev pen prokýratýra qyzmetkeri Aleksei Bondarev qatysqan janjaldyń videosy tarap jatyr, - dep habarlaidy Massaget.kz.
Internette taraǵan videoda birneshe er adam balaǵat sózder aityp, janjaldasyp turǵany túsirilgen. Bul rette kadrdan shette turyp, jaǵdaidy baqylap turǵan Kriminaldyq politsiia basqarmasy bastyǵynyń orynbasary Ermek Tobylbaev kórinedi. Oqiǵa barysynda janjaldasyp turǵan er adamdar arasynda tóbeles bastalady. Osy kezde video aiaqtalady.
Video jelide taraǵannan keiin polkovnik Ermek Tobylbaev oqiǵaǵa qatysty pikir bildiredi. Ol video qandai jaǵdaida túsirilgenin aitty.
Nazar aýdaryńyz! Videoda balaǵat sózder aitylǵan.
"Bul jazba 4 shildede túsirilgen. Meniń uialy telefonyma Kriminaldyq politsiia basqarmasynyń baqylaýynda turǵan alaiaqtyq deregine qatysty qylmystyq iske qatysýshydan qońyraý tústi. Maǵan qalada qylmystyq iske qatysýshylardyń jinalysy josparlanǵany aityldy. Zańsyz áreketti boldyrmaý ári mán-jaidy anyqtaý úshin oqiǵa ornyna bardym, sonymen qatar, sol kezde patrýldik politsiia polkiniń jasaǵyn shaqyrdym. Oqiǵa ornyna kelip, jaǵdaidy baqyladym. Basynda bári tynysh boldy. Taraptar daý týdyrǵan avtokólik týraly jai sóilesti. Qatysýshylardyń biri ekinshisin urǵan kezde, men shaqyrǵan jasaq aralasyp ketti. Qaqtyǵystyń barlyq qatysýshysy Politsiia bólimine jetkizildi", - dedi Ermek Tobylbaev.
Sondai-aq, polkovnik bolǵan oqiǵadan keiin QR Qylmystyq kodeksiniń 293-baby "Buzaqylyq" boiynsha sotaldy tergeý bastalǵanyn aitty.
Videoǵa qatysty Qaraǵandy oblysy prokýratýrasynyń baspasóz qyzmeti ókili de pikir bildirdi. Vedomstvo málimetinshe, Aleksei Bondarev 2021 jylǵy 30 jeltoqsannan bastap prokýratýra organdarynda jumys istemeidi.
"Jelide quqyq qorǵaý organdary qyzmetkerleri janjaldasqan video tarady. Videoǵa jazylǵan pikirde Qaraǵandy oblysy prokýratýrasynyń qyzmetkeri A.E. Bondarev osy oqiǵaǵa qatysqany aitylǵan. Qaraǵandy oblysynyń prokýratýrasy A.E. Bondarev 2021 jylǵy 30 jeltoqsannan bastap prokýratýra organdarynyń qyzmetkeri emes ekenin habarlaidy", - dep atap ótti vedomstvo ókili.
