Foto: ashyq derekkóz
Qaraǵandy qalasynda mekteptiń keńeitimi men oǵan tiesili jer telimin jekeshelendirý zańǵa qaishy dep tanylyp, sot arqyly mámileler men ákimdik qaýlylarynyń kúshi joiyldy, dep habarlaidy Ult.kz.
2000 jyly qalalyq kommýnaldyq múlikti basqarý departamenti mekteptiń eki qabatty keńeitimin jekemenshik joǵary oqý ornyna 789 myń teńgege satqan. Keiin 2006 jyly qala ákimdigi jeke tulǵaǵa osy nysandy paidalaný úshin jer telimin bergen. Alaida 2009 jyly bul sheshimge ózgeris engizilip, jer paidalanýshy retinde azamattyń ornyna ýniversitet kórsetilgen.
Budan keiin ýniversitet pen jer qatynastary bólimi arasynda 1 gektar jerdi satyp alý-satý kelisimsharty jasalǵan. Ýákiletti organ tekseris júrgizip, birqatar zań buzýshylyqty anyqtady: mektep taratylmaǵan, al jekeshelendirilgen keńeitim mekteppen bir keshen retinde qarastyrylǵan, olardyń ortaq zańdy mekenjaiy men bir kadastrlyq nómiri bar.
«Jekeshelendirý týraly» jáne «Jer týraly» Jarlyqtardyń talaptaryna sáikes, mundai nysandardy jeke menshikke berýge bolmaidy. Sot mámileniń mazmuny zań talaptaryna qaishy ekenin jáne quqyqtyq tártip negizderine qarsy jasalǵanyn atap ótip, satyp alý-satý sharttaryn jaramsyz dep tanydy.
Nátijesinde, jer ýchaskesi men ǵimarat memleket menshigine qaitaryldy. Apelliatsiialyq sot birinshi instantsiia sheshimin tolyq kúshinde qaldyrdy.
