Qaraǵandyda Sáken Seifýllinniń 125 jyldyǵyna arnalǵan halyqaralyq aitys qarsańynda uly aqyn, jazýshy, qoǵam jáne memleket qairatkeri týraly kitaptyń tusaýkeseri ótti. Elordada jaryq kórgen basylymnyń avtory – QR Eńbek sińirgen qairatkeri, aqyn Amanjol Áltaev.
«Men Saken aǵaǵa arnalǵan kitapty burynnan shyǵarǵym kelgen. Aqyrynda osy oiymnyń sáti tústi. «Sáken» kitaby Qaraǵandy oblysy ákimdiginiń qoldaýymen uly aqyn jáne jazýshymyzdyń mereitoiyna 1000 dana taralymmen jaryq kórdi. Basylym úsh bólimnen turady. Birinshi bólimde Sáken Seifýllin týraly maqalalar men ǵylymi materialdar bar. Ári qarai belgili jáne jas avtorlardyń Sáken týraly óleńderi bar. Úshinshi bólimde Sáken Seifýllinniń shyǵarmalary usynylǵan. Tirajdyń bir bóligi kitaphanalarǵa túsedi», - dedi Amanjol Áltaev baspasóz máslihatynda.
Halyqaralyq aitys Qaraǵandy oblysy ákimdigi men Nur Otan partiiasynyń qoldaýymen «Rýhani jańǵyrý» baǵdarlamasy aiasynda ótkiziledi. Ol 18 qyrkúiekte S. Seifýllin atyndaǵy oblystyq qazaq drama teatrynyń sahnasynda bastalady. Qazaqstan, Qyrǵyzstan, Mońǵoliia jáne Qytaidan kelgen 18 aqyn sahna tórinde óz ánderin oryndaidy.
Uiymdastyrýshylar óte myqty aqyndar jinalǵanyn, qatysýshylar arasynda jas talanttar bar ekenin atap ótti.
«Aitys – qazaqtyń ejelgi óneri jáne óte kúrdeli, sebebi aqyndar tolyǵymen sýyryp salma óneriniń kómegimen jeńiske jete alady. Bizdiń halyq olardy óte jaqsy kóredi. Ár aitysta árqashan zalda ine shanshar jer bolmaidy. Sebebi árdaiym myqty aqyndar jinalady», - deidi qazylar alqasynyń tóraǵasy, tanymal akter jáne rejisser, Halyq ártisi, Qazaqstannyń Eńbek Eri Asanáli Áshimov.
Aitys eki kún ótedi – 18 jáne 19 qyrkúiekte. Gran-pri iegeri 3 mln teńge kóleminde aqshalai syilyq alady. Birinshi oryn úshin – 1,5 mln teńge, ekinshi oryn úshin – 750 myń teńge, úshinshi oryn úshin – 500 myń teńge utys tigilip otyr. Sonymen qatar eki arnaiy júlde qarastyrylǵan.
Aitystyń ashylý saltanaty 11.00-de ótedi. Kirý tegin. Kórermenderdi barynsha kóbirek tartý úshin zaldan transliatsiia uiymdastyrylady. Ekrandar teatrdyń foiesi men kishi zalynda ornatylady.
